എ കെ ജെ അയ്യര്‍|
Last Modified ശനി, 21 ഒക്‌ടോബര്‍ 2023 (15:10 IST)
തിരുവനന്തപുരം: വീഡിയോ കോളിനിടെ യുവാവ് തൂങ്ങിമരിച്ചു. നെടുമങ്ങാട് പേരുമല നാരകത്തിൻപൊയ്ക വീട്ടിൽ റിയാസ് എന്ന മുപ്പത്തെട്ടുകാരനാണ് ഈ കടുംകൈ ചെയ്തത്. ഭാര്യയുടെ ബന്ധുവിനെ വീഡിയോ കോൾ ചെയ്യുന്നതിനിടെയാണ് ഇയാൾ തൂങ്ങിമരിച്ചത്.
മീൻ വില്പനക്കാരനായ ഇയാൾ സുഹൃത്തിന്റെ വാടക വീട്ടിൽ വച്ചായിരുന്നു ജീവനൊടുക്കിയത്. കഴിഞ്ഞ മൂന്നു മാസമായി ഇയാൾ ഭാര്യയുമായി പിണങ്ങി കഴിയുകയായിരുന്നു. ഇതാണ് ആത്മഹത്യയ്ക്ക് കാരണം എന്നാണു പ്രാഥമിക നിഗമനം.
കഴിഞ്ഞ ദിവസം വൈകിട്ട് ഇയാൾ സുഹൃത്തായ നസീറിന്റെ വീട്ടിൽ ചെന്നിരുന്നു. എന്നാൽ പിതാവിന്റെ മരണത്തെ തുടർന്ന് നസീറിന്റെ വീട്ടിൽ ആരും ഉണ്ടായിരുന്നില്ല. ഇവിടെ വച്ച മദ്യപിച്ച ശേഷം രാത്രി എട്ടു മണിയോടെ നസീർ ഉറങ്ങാൻ പോയി. അതിനു ശേഷമാണ് റിയാസ് ഭാര്യാ സഹോദരിയുടെ ഭർത്താവിനെ വീഡിയോ കോളിൽ വിളിച്ച ശേഷം ഫാനിൽ കെട്ടിത്തൂങ്ങിയത്.
കുറച്ചു കഴിഞ്ഞപ്പോൾ നസീർ ഉറക്കമുണർന്നു നോക്കിയപ്പോഴാണ് റിയാസിനെ തൂങ്ങിമരിച്ച നിലയിൽ കാണുന്നത്. നസീർ വിവരം ഉടൻ തന്നെ നെടുമങ്ങാട് പോലീസിൽ അറിയിച്ചു. നെടുമങ്ങാട് പോലീസ് സ്ഥലത്തെത്തി കേസെടുത്ത ശേഷം തുടർ നടപടികളെടുത്തു. റിയാസ് ബന്ധുക്കളെ പേടിപ്പെടുത്താനായി തൂങ്ങിമരണം അഭിനയിച്ചപ്പോൾ അബദ്ധത്തിൽ മരിച്ചതാകാം എന്നാണു ബന്ധുക്കൾ പറയുന്നത്.
