യുപിഐ ചാര്‍ജുകള്‍ക്കെതിരെ പ്രതിഷേധം: ഡിജിറ്റല്‍ പണമിടപാടുകള്‍ ബഹിഷ്‌കരിക്കുമെന്ന് റെസ്റ്റോറന്റുകളും സൂപ്പര്‍മാര്‍ക്കറ്റുകളും
കൊച്ചി: യുപിഐ (UPI) ഇടപാടുകള്‍ക്ക് ചാര്‍ജ് ഏര്‍പ്പെടുത്താനുള്ള നീക്കത്തില്‍ പ്രതിഷേധിച്ച് 2,000 രൂപയ്ക്ക് മുകളിലുള്ള യുപിഐ പേയ്മെന്റുകള്‍ സ്വീകരിക്കുന്നത് ഒക്ടോബര്‍ 15 മുതല്‍ നിര്‍ത്തിവെക്കുമെന്ന് കേരള ഹോട്ടല്‍ ആന്‍ഡ് റസ്റ്റോറന്റ് അസോസിയേഷന്‍ (KHRA) അറിയിച്ചു. ചെറിയ ഭക്ഷണശാലകളും വലിയ റെസ്റ്റോറന്റുകളും ഡിജിറ്റല്‍ പേയ്മെന്റുകള്‍ സ്വീകരിക്കുന്നതോടെ ഹോട്ടല്‍ മേഖലയിലെ ദൈനംദിന ഇടപാടുകളുടെ അവിഭാജ്യ ഘടകമായി യുപിഐ (UPI) മാറിക്കഴിഞ്ഞു. നിര്‍ദ്ദിഷ്ട നിരക്കുകള്‍ റെസ്റ്റോറന്റ് ഉടമകളുടെ സാമ്പത്തിക ബാധ്യത വര്‍ദ്ധിപ്പിക്കുകയും ചെറിയ സ്ഥാപനങ്ങളെ പ്രതികൂലമായി ബാധിക്കുകയും ചെയ്യുമെന്ന് അസോസിയേഷന്‍ പ്രസിഡന്റ് ജി. ജയപാലും ജനറല്‍ സെക്രട്ടറി എന്‍. അബ്ദുള്‍ റസാക്കും പറഞ്ഞു.
വിലക്കയറ്റം പോലുള്ള വെല്ലുവിളികള്‍ നേരിടുന്ന ഹോട്ടല്‍ മേഖലയ്ക്ക് ഇനി അധിക സാമ്പത്തിക ബാധ്യത താങ്ങാനാവില്ലെന്ന് അവര്‍ കൂട്ടിച്ചേര്‍ത്തു.
അതേസമയം നിര്‍ദ്ദിഷ്ട നിരക്കുകള്‍ക്കെതിരായ പ്രതിഷേധ സൂചകമായി ഒക്ടോബര്‍ 15 മുതല്‍ യുപിഐ (UPI) വഴിയുള്ള പണമിടപാടുകള്‍ സ്വീകരിക്കുന്നത് നിര്‍ത്തിവെക്കുമെന്ന് സൂപ്പര്‍ മാര്‍ക്കറ്റ് വെല്‍ഫെയര്‍ അസോസിയേഷന്‍ കേരള (SWAK) അറിയിച്ചു.
