അല്ലു അര്‍ജുന്‍ ആരാധകര്‍ ആവേശത്തിലാണ്.'പുഷ്പ: ദി റൈസ്' തീയറ്ററുകളില്‍ ആഘോഷമാക്കുകയാണ് സിനിമ പ്രേമികള്‍. സിനിമയിലെ ഫഹദിന്റെ പ്രകടനത്തെ പ്രശംസിച്ചുകൊണ്ട് രംഗത്തെത്തിയിരിക്കുകയാണ് സംവിധായകന്‍ ജിസ് ജോയ്.

''പുഷ്പ: ദി റൈസ്' എന്ന ചിത്രത്തിലെ രസകരമായ ഘടകം, പ്രത്യേകിച്ച് നമ്മള്‍ മലയാളികള്‍ക്ക് ഫഹദ് ഫാസിലിന്റെ സാന്നിധ്യമാണ്. 'കുമ്പളങ്ങി നൈറ്റ്സി'ലെ ഷമ്മിയുടെ വേഷം അദ്ദേഹം അവതരിപ്പിച്ച രീതി നമുക്കെല്ലാവര്‍ക്കും ഇഷ്ടമായതാണ്. 'കുമ്പളങ്ങി നൈറ്റ്സി'ലേതിന് സമാനമായ കഥാപാത്രമാണ് 'പുഷ്പ: ദ റൈസ്' എന്ന ചിത്രത്തിലെ ഫഹദ് ഫാസിലിന്റെ കഥാപാത്രം. ഭന്‍വര്‍ സിംഗ് ഷെഖാവത്ത് ഐപിഎസ് എന്ന കഥാപാത്രത്തെയാണ് അദ്ദേഹം അവതരിപ്പിച്ചത്. ഒരു മലയാളി എന്ന നിലയിലും ഫഹദിന്റെ സുഹൃത്ത് എന്ന നിലയിലും എനിക്ക് സിനിമ കണ്ടപ്പോള്‍ അഭിമാനം തോന്നി.അല്ലു അര്‍ജുന്റെ പ്രകടനവും എന്നെ അത്ഭുതപ്പെടുത്തി,''- ജിസ് ജോയ് പറഞ്ഞു.

അല്ലു അര്‍ജുന്റെ പുഷ്പ എന്ന കഥാപാത്രത്തെ കൂടുതല്‍ ശക്തമാക്കുന്നത് എതിരാളിയാണ് - ഫഹദ് ഫാസില്‍ അവതരിപ്പിച്ച ഭന്‍വര്‍ സിംഗ് ഷെഖാവത് ഐപിഎസ് ആണെന്നും ജിസ് ജോയ് കൂട്ടിച്ചേര്‍ക്കുന്നു.