അനുബന്ധ വാര്ത്തകള്
- നിപ ആശങ്ക അകലുന്നു; 49 പേരുടെ പരിശോധനാ ഫലങ്ങള് നെഗറ്റീവായി
- വവ്വാലുകളെ ഓടിക്കരുത്, പന്നികളെ ശ്രദ്ധിക്കണം: നിപ വ്യാപനത്തില് മുന്നറയിപ്പുമായി മൃഗസംരക്ഷണ വകുപ്പ്
- നിപ ഉണ്ടെന്ന് കണ്ടെത്തുന്നതും സാമ്പിളുകള് സ്വീകരിക്കുന്നതും എങ്ങനെയെന്നറിയാമോ?
- നിപ വ്യാപനം: കേന്ദ്ര മൃഗസംരക്ഷണ വകുപ്പിന്റെ വിദഗ്ധ സംഘം ഇന്ന് മുതല് വൈറസ് ബാധിത പ്രദേശങ്ങളില് പഠനം നടത്തും
- ജലമോഷണം അറിയിക്കുന്നവര്ക്ക് 5000 രൂപ വരെ പാരിതോഷികം നല്കാന് വാട്ടര് അതോറിറ്റി
നിപ എന്തുകൊണ്ട് വീണ്ടും കോഴിക്കോട്? സംസ്ഥാനം സീറോ സര്വലന്സ് പഠനം നടത്തും
നിപ എന്തുകൊണ്ടു വീണ്ടും കോഴിക്കോട് എന്നതുമായി ബന്ധപ്പെട്ട് ഐ.സി.എം.ആര്. വ്യക്തമായ ഉത്തരം നല്കിയിട്ടില്ലെന്നും, ഇതുമായി ബന്ധപ്പെട്ടു സംസ്ഥാനം സീറോ സര്വലന്സ് പഠനം നടത്താന് തീരുമാനിച്ചിട്ടുണ്ടെന്നും മുഖ്യമന്ത്രി പിണറായി വിജയന്. ഇക്കാര്യത്തില് വിശദമായ പ്രൊപ്പോസല് തയാറാക്കാന് ആരോഗ്യ വകുപ്പിനോട് ആവശ്യപ്പെട്ടിട്ടുണ്ടെന്നും മുഖ്യമന്ത്രി പറഞ്ഞു.
വവ്വാലുകളെ സംബന്ധിച്ച് ഐ.സി.എം.ആര് നടത്തിയ പഠനത്തിന്റെ വിവരങ്ങളും നമുക്ക് ലഭ്യമാകും. വവ്വാലിനെ പിടിക്കാതെ തന്നെ സാമ്പിള് ശേഖരിച്ചുള്ള ഗവേഷണം തോന്നക്കല് വൈറളോജി ഇന്സ്റ്റിട്ട്യൂട്ടിന്റെ സഹായത്തോടെ നടപ്പാക്കും. 2018ല് കോഴിക്കോടും 2019ല് എറണാകുളത്തും 2021ല് വീണ്ടും കോഴിക്കോടും നിപ രോഗബാധ ഉണ്ടായിട്ടുണ്ട്. സംസ്ഥാനത്തു നിപ രോഗനിര്ണയത്തിനായി ലാബുകള് സജ്ജമാണ്. തോന്നക്കലിലെ ഇന്സ്റ്റിറ്റൂട്ട് ഓഫ് വൈറോളജിയില് നിപ വൈറസ് രോഗം നിര്ണ്ണയിക്കാന് സാമ്പിള് പരിശോധനാ സംവിധാനമുണ്ട്.
2021 സെപ്റ്റംബര് മുതല് കോഴിക്കോട് മെഡിക്കല് കോളേജിലെ പ്രത്യേകം സജ്ജീകരിച്ച ലാബില് നിപ രോഗ നിര്ണയ പരിശോധന നടന്നുവരുന്നുണ്ട്. ഇതു രണ്ടും സംസ്ഥാന സര്ക്കാരിന്റെ ഉടമസ്ഥതയിലും നിയന്ത്രണത്തിലുമുള്ളതാണ്. 2018ല് സംസ്ഥാനത്ത് നിപ രോഗബാധ സംബന്ധിച്ച പ്രോട്ടോകോള് പുറത്തിറക്കിയിരുന്നു. 2021 സെപ്റ്റംബറില് ഇത് പരിഷ്കരിച്ചു. നിപ ചികില്സ, മരുന്നുകള്, ഐസൊലേഷന്, സാമ്പിള് പരിശോധന തുടങ്ങിയ കാര്യങ്ങള് നടപ്പിലാക്കുന്നത് ഈ പ്രോട്ടോകോള് പ്രകാരമാണ്. പുതിയ ശാസ്ത്രീയ നിഗമനങ്ങളുടെ അടിസ്ഥാനത്തില് 2023ല് ചെറിയ ചില മാറ്റങ്ങളോടെ 2021ലെ പ്രോട്ടോകോളും ആരോഗ്യവിദഗ്ധ സമിതി പരിഷ്കരിച്ചിട്ടുണ്ട്. 2022ല് ആരോഗ്യം, വനം, മൃഗസംരക്ഷണം തുടങ്ങിയ വകുപ്പുകളെ ഏകോപിപ്പിച്ച് നടത്തിയ വര്ക്ക്ഷോപ്പില് സുപ്രധാനങ്ങളായ പരിപാടികള് ആവിഷ്കരിച്ചിരുന്നു.
