രേണുക വേണു|
Last Modified ചൊവ്വ, 13 ഓഗസ്റ്റ് 2024 (16:16 IST)
മോഹന്‍ലാലും ശോഭനയും മത്സരിച്ചഭിനയിച്ച എവര്‍ഗ്രീന്‍ റൊമാന്റിക്-കോമഡി ചിത്രം തേന്മാവിന്‍ കൊമ്പത്ത് വീണ്ടും തിയറ്ററുകളിലേക്ക്. 4K സാങ്കേതിക മികവിലാണ് ചിത്രം റി റിലീസ് ചെയ്യുക. E4 എന്റര്‍ടെയ്ന്‍മെന്റ്‌സാണ് തേന്മാവിന്‍ കൊമ്പത്ത് വീണ്ടും തിയറ്ററുകളിലെത്തിക്കാന്‍ ശ്രമങ്ങള്‍ ആരംഭിച്ചിരിക്കുന്നത്. അടുത്ത ആറ് മാസത്തിനുള്ളില്‍ റി റിലീസ് ഉണ്ടായേക്കുമെന്നാണ് റിപ്പോര്‍ട്ടുകള്‍.
മോഹന്‍ലാല്‍ ചിത്രം ദേവദൂതന്‍ കഴിഞ്ഞ മാസം റി റിലീസ് ചെയ്തിരുന്നു. മോഹന്‍ലാലും ശോഭനയും സുരേഷ് ഗോപിയും ഒന്നിച്ച മണിച്ചിത്രത്താഴും റി റിലീസിനു ഒരുങ്ങുകയാണ്. തേന്മാവിന്‍ കൊമ്പത്ത് കൂടി എത്തുമ്പോള്‍ ഈ വര്‍ഷം റി റിലീസ് ചെയ്യുന്ന മൂന്നാമത്തെ മോഹന്‍ലാല്‍ ചിത്രമാകും.
പ്രിയദര്‍ശന്‍ സംവിധാനം ചെയ്ത തേന്മാവിന്‍ കൊമ്പത്ത് 1994 ലാണ് റിലീസ് ചെയ്തത്. തിയറ്ററുകളില്‍ വന്‍ വിജയമായ ഈ ചിത്രം നിര്‍മിച്ചിരിക്കുന്നത് എന്‍.ഗോപാലകൃഷ്ണന്‍. പ്രിയദര്‍ശന്‍ തന്നെയാണ് തിരക്കഥ. ബേണി - ഇഗ്നേഷ്യസ് ഗാനങ്ങളും എസ്.പി.വെങ്കടേഷ് പശ്ചാത്തല സംഗീതവും ഒരുക്കിയിരിക്കുന്നു. കെ.വി.ആനന്ദ് ആണ് ക്യാമറ. മോഹന്‍ലാല്‍, ശോഭന എന്നിവര്‍ക്കു പുറമേ നെടുമുടി വേണു, ശ്രീനിവാസന്‍, കവിയൂര്‍ പൊന്നമ്മ, കെ.പി.എ.സി ലളിത, സുകുമാരി, ശങ്കരാടി, കുതിരവട്ടം പപ്പു എന്നിവരും ശ്രദ്ധേയമായ കഥാപാത്രങ്ങളെ അവതരിപ്പിച്ചിരിക്കുന്നു.
