രൺവീർ സിങ്ങിനെ നായകനാക്കി ആദിത്യ ധർ സംവിധാനം ചെയ്ത മാസ്സ് ആക്ഷൻ ത്രില്ലർ ചിത്രമാണ് ‘ധുരന്ദർ’. മികച്ച പ്രതികരണമായിരുന്നു സിനിമക്കും സിനിമയിലെ FA9LA എന്ന ഗാനത്തിനു ലഭിച്ചത്. ഫ്ലിപ്പരാച്ചി എന്ന പേരിൽ അറിയപ്പെടുന്ന ബഹ്‌റൈനി റാപ്പറായ ഹുസം അസീമാണ് ​ഈ ​ഗാനം കമ്പോസ് ചെയ്തിരിക്കുന്നത്. ​ ബിൽബോർഡ് അറേബ്യ മ്യൂസിക് ചാർട്ടുകളിൽ ഒന്നാമതെത്തിയതോടെ ഗാനമിപ്പോൾ ഗിന്നസ് വേൾഡ് റെക്കോർഡിൽ ഇടം നേടിയിരിക്കികയാണ്.

പാട്ടിൽ അക്ഷയ് ഖന്ന ഡാൻസ് കളിച്ച് വരുന്ന സീൻ ലോകമാകെ ട്രെന്റിങ് ആയിരുന്നു. പക്കാ വൈബിൽ സ്റ്റൈലിഷ് മൂഡിലാണ് നടന്റെ ഡാൻസ്. തിയേറ്ററിൽ ഈ സീനിന് വലിയ കയ്യടികളാണ് ലഭിച്ചത്. കൂടാതെ സോഷ്യൽമീഡിയയിൽ ഗാനത്തിനൊത്തുള്ള റീൽസുകളുടെ തരം​ഗമാണ്.

ജനുവരി ഒന്നുവരെ ഗാനം നാല് വ്യത്യസ്ത അറബിക് ബിൽബോർഡ് ചാർട്ടുകളിൽ മുന്നിലായിരുന്നു.

2024 മെയ് മാസത്തിലാണ് FA9LA പുറത്തിറങ്ങിയത്. എന്നാൽ ധുരന്ധറിൽ പ്രത്യക്ഷപ്പെട്ടതിനുശേഷമാണ്​ ​ഗാനം വൻ ജനപ്രീതി നേടിയത്. വിജയത്തിന് പിന്നാലെ ഫ്ലിപ്പരാച്ചി തന്റെ ഇന്ത്യൻ പര്യടനവും പ്രഖ്യാപിച്ചു. മാർച്ച് 14 ന് ബെംഗളൂരുവിൽ നടക്കുന്ന UN40 മ്യൂസിക് ഫെസ്റ്റിവലിലാണ് താരം പങ്കെടുക്കുന്നത്. ബഹ്റൈനിലെ മനാമാ സ്വദേശിയായ ഫ്ലിപ്പരാച്ചിയുടെ ബോളിവുഡ് അരങ്ങേറ്റം കൂടിയാണ് ഈ ഗാനം.

ജിയോ സ്റ്റുഡിയോസ്,
ബി62 സ്റ്റുഡിയോസ് എന്നിവർ ചേർന്ന് നിർമിച്ച ചിത്രത്തിൽ സഞ്ജയ് ദത്ത്, ആർ മാധവൻ, അർജുൻ രാംപാൽ എന്നിവരും നിർണ്ണായക വേഷങ്ങളിലെത്തിയിരുന്നു. 'ഉറി ദ സർജിക്കൽ' സ്ട്രൈക്ക് എന്ന ചിത്രത്തിലൂടെ ശ്രദ്ധ നേടിയ സംവിധായകനാണ് ആദിത്യ ധർ. രണ്ട്‌ ഭാഗങ്ങളായി ചിത്രീകരിച്ച സിനിമയുടെ അടുത്ത ഭാഗം മാർച്ചിൽ റിലീസ് ചെയ്യും.