കൊച്ചി: കശുവണ്ടി വ്യവസായത്തില്‍ പങ്കാളിയാക്കാമെന്ന് ധരിപ്പിച്ചു ലക്ഷങ്ങള്‍ തട്ടിയെടുത്ത കേസിലെ പ്രതിയെ പോലീസ് അറസ്‌റ് ചെയ്തു. കോതമംഗലം സ്വദേശി ജിന്റോ വര്‍ക്കി (35) യാണ് ചെറുവട്ടൂര്‍ സ്വദേശിയെ കബളിപ്പിച്ച് 40 ലക്ഷം രൂപയും വാഹനവും തട്ടിയെടുത്ത് മുങ്ങിയത്.

ചെറുവട്ടൂര്‍ സ്വദേശിയായ പരാതിക്കാരന്റെ അര ഏക്കര്‍ സ്ഥലം കശുവണ്ടി വ്യവസായം നടത്താനായി വാടകയ്ക്ക് നല്‍കിയാല്‍ പ്രതിമാസം മുപ്പതിനായിരം രൂപ നല്‍കാമെന്നും ജിനോ വാഗ്ദാനം ചെയ്തു. ഇതിനൊപ്പം ഫാക്ടറിയില്‍ പങ്കാളിയാക്കാമെന്നും വിശ്വസിപ്പിച്ചു. കൂടാതെ പരാതിക്കാരന്റെ വ്യാജ ഒപ്പിട്ടു വാഹനങ്ങളും വാങ്ങി.

തട്ടിപ്പ് നടത്തിയ ശേഷം ഒളിവില്‍ പോയ പ്രതിയെ ജില്ലാ റൂറല്‍ എസ.പി. കെ.കാര്‍ത്തിക്കിന്റെ നേതൃത്വത്തിലുള്ള പോലീസ് സംഘമാണ് അറസ്റ്റ് ചെയ്തത്. ജിന്റോയ്ക്കെതിരെ വിവിധ പോലീസ് സ്റ്റേഷനുകളിലാണ് പതിനെട്ടോളം കേസുകളുണ്ടെന്ന് പോലീസ് വെളിപ്പെടുത്തി.