ഖത്തർ ലോകകപ്പിലെ ഫൈനലിൽ മിന്നും പ്രകടനം കാഴ്ചവെച്ച ഫ്രഞ്ച് താരം കിലിയൻ എംബാപ്പെയെ ടീമിലെത്തിക്കാൻ ഉറച്ച് സ്പാനിഷ് ക്ലബായ റയൽ മാഡ്രിഡ്. നിലവിൽ പിഎസ്ജിയുമായി കരാറുള്ള താരത്തിനായി സ്വപ്നസമാനമായ ഓഫറാണ് ക്ലബ് മുന്നിലേക്ക് വെയ്ക്കുന്നത്. നേരത്തെ തന്നെ പിഎസ്ജിയിൽ നിന്ന് താരം ഈ സീസണിൽ റയലിലെത്തുമെന്ന് അഭ്യൂഹമുണ്ടായിരുന്നു.

നിലവിൽ ലോകത്തിലെ ഏറ്റവും മികച്ച മുന്നേറ്റനിരയുള്ള ടീമാണ് പിഎസ്ജി. എംബാപ്പെയ്ക്ക് പുറമെ ബ്രസീൽ സൂപ്പർ താരം നെയ്മറും അർജൻ്റീന നായകൻ ലയണൽ മെസ്സിയും പിഎസ്ജിക്കുണ്ട്. ലയണൽ മെസ്സി ക്ലബുമായുള്ള കരാർ നീട്ടാൻ തയ്യാറായി നിൽക്കുകയാണ്. നെയ്മറും ക്ലബ് വിടുന്ന കാര്യത്തിൽ പ്രതികരിച്ചിട്ടില്ല. ഇരുവരേക്കാൾ വലിയ പ്രതിഫലം എംബാപ്പയ്ക്കാണെങ്കിലും ടീമിൽ താരങ്ങൾക്കിടയിൽ ഐക്യമില്ലെന്ന വിമർശനം ശക്തമാണ്.

എംബാപ്പെയെ ടീമിലെത്തിക്കാനായി 8761.22 കോടിയുടെ പാക്കേജാണ് റയൽ മുന്നോട്ട് വെയ്ക്കുന്നത്. 14 തവണ ചാമ്പ്യൻസ് ലീഗ് സ്വന്തമാക്കിയിട്ടുള്ള ടീമാണ് റയൽ മാഡ്രിഡ്. എംബാപ്പെയെ ടീമിലെത്തിച്ച് ഭാവിനിരയെ അണിയിച്ചൊരുക്കാനാണ് റയൽ മാഡ്രിഡ് ലക്ഷ്യമിടുന്നത്.