ടെസ്റ്റ് ക്രിക്കറ്റ് വിക്കറ്റിൻ ഇന്ത്യൻ സൂപ്പർ പേസർ ജസ്പ്രിത് ബുമ്രയ്ക്ക് മുന്നിൽ ഒരു ടാർഗറ്റ് വച്ച് ഇന്ത്യയുടെ മുൻ ഓൾറൗണ്ടർ യുവ്‌രാജ് സിങ്. ടെസ്റ്റിൽ 600 വിക്കറ്റുകൾ തികച്ച് ചരിത്ര റെക്കോർഡിട്ട ഇതിഹാസ പേസർ ജെയിംസ് ആന്‍ഡേഴ്‌സനെ അഭിനന്ദിച്ചുള്ള ബുമ്രയുടെ ട്വീറ്റിന് കീഴിലാണ് യുവ്‌രാജ് ബുമ്രയ്ക്ക് മുന്നിൽ ഒരു ടാർഗറ്റ് വച്ചത്. ടെസ്റ്റിൽ ഏറ്റവും കുറഞ്ഞത് 400 വിക്കറ്റെങ്കിലും സ്വന്തമാക്കണം എന്നതാവണം ലക്ഷ്യം എന്നാണ് യുവി ബുമ്രയോട് പറയുന്നത്.

അവിസ്മരണീമായ നേട്ടത്തിന് അഭിനന്ദനങ്ങള്‍. നിങ്ങളുടെ പാഷന്‍, മനോഭാവം എല്ലാം അസാധാരണമാണ്. എല്ലാ ആശംസകളും നേരുന്നുവെന്നായിരുന്നു ബുമ്രയുടെ ട്വിറ്റ്. ബുമ്രയുടെ ട്വീറ്റിന് താഴെ കമന്റുമായി യുവ്‌രാജ് എത്തി. നിന്റെ ടാർഗറ്റ് ഏറ്റവും കുറഞ്ഞത് 400 ടെസ്റ്റ് വിക്കറ്റുളാണ് എന്നാണ് യുവരാജിന്റെ കമന്റ്. എന്നാൽ യുവ്‌രാജിന്റെ കമന്റിന് ബുമ്ര മറുപടി നൽകിയിട്ടില്ല.

പിന്നീട് ആൻഡേഴ്സന് ആശംസകളുമായി യുവിയും എത്തി. ഒരു ഫാസ്റ്റ് ബൗളര്‍ 600 ടെസ്റ്റ് വിക്കറ്റുകളെടുക്കുന്നത് കാണാന്‍ ജീവിതത്തില്‍ ഒരിക്കലും അവസരം ലഭിക്കുമെന്ന് കരുതിയിരുന്നില്ല. വിക്കറ്റുകളുടെ എണ്ണത്തെ മാത്രമല്ല അദ്ദേഹത്തിന്റെ ബൗളിങിന്റെ നിലവാരം കൂടിയാണ് വ്യക്തമാകുന്നത്. സ്ലോയോ, ഫാസ്റ്റ് വിക്കറ്റോ, ബൗസുള്ളതോ, ഇല്ലാത്തതോ, സീമുള്ളതോ, ഇല്ലാത്തതോ, അദ്ദേഹത്തെ സംബന്ധിച്ച് ഇതൊന്നും ഒരിക്കലും വിഷയമാവാറില്ല. സര്‍, നിങ്ങളാണ് GOAT എന്നായിരുന്നു യുവ്‌രാജിന്റെ കുറിപ്പ്