രേണുക വേണു|
Last Updated:
ചൊവ്വ, 27 ഓഗസ്റ്റ് 2024 (14:57 IST)
താരസംഘടനയായ 'അമ്മ'യില്‍ പൊട്ടിത്തെറി. മോഹന്‍ലാല്‍ പ്രസിഡന്റ് സ്ഥാനം രാജിവെച്ചു. എക്‌സിക്യൂട്ടീവിലെ 17 അംഗങ്ങളും രാജി സന്നദ്ധത അറിയിച്ചു. പ്രസിഡന്റ് സ്ഥാനം ഒഴിയുകയാണെന്ന് മോഹന്‍ലാല്‍ മുഖ്യമന്ത്രി പിണറായി വിജയനെ അറിയിച്ചു. ഹേമ കമ്മിറ്റി റിപ്പോര്‍ട്ട് വിവാദങ്ങള്‍ക്കു പിന്നാലെയാണ് കൂട്ടരാജി.
ഹേമ കമ്മിറ്റി റിപ്പോര്‍ട്ട് പുറത്തുവന്നതിനു പിന്നാലെ മലയാളത്തിലെ പ്രമുഖ താരങ്ങള്‍ക്കെതിരെ ലൈംഗിക അതിക്രമ പരാതികള്‍ ഉയര്‍ന്നിരുന്നു. ആരോപണ വിധേയരില്‍ ഒരാളായ നടന്‍ സിദ്ദിഖ് 'അമ്മ' ജനറല്‍ സെക്രട്ടറി സ്ഥാനം രാജിവയ്ക്കുകയും ചെയ്തു.
ഹേമ കമ്മിറ്റി റിപ്പോര്‍ട്ടുമായി ബന്ധപ്പെട്ട കാര്യങ്ങള്‍ ചര്‍ച്ച ചെയ്യാന്‍ 'അമ്മ' അടിയന്തര എക്‌സിക്യൂട്ടീവ് യോഗം ചേരുമെന്ന് നേരത്തെ വാര്‍ത്തകളുണ്ടായിരുന്നു. എന്നാല്‍ മോഹന്‍ലാലിന്റെ അസൗകര്യത്തെ തുടര്‍ന്ന് എക്‌സിക്യൂട്ടീവ് യോഗം മാറ്റുകയായിരുന്നു. എക്‌സിക്യൂട്ടീവ് പോലും ചേരാതെയാണ് ഇപ്പോള്‍ സംഘടന ഭാരവാഹികളുടെ കൂട്ടരാജി.
