യൂട്യൂബ് വ്‌ളോഗര്‍മാരായ ഇ ബുള്‍ജെറ്റ് സഹോദരന്‍മാര്‍ അറസ്റ്റിലായ വിഷയത്തില്‍ കൊല്ലം എംഎല്‍എയും നടനുമായ മുകേഷിനും ഫോണ്‍ കോള്‍. ഇ ബുള്‍ജെറ്റ് സഹോദരങ്ങളെ പുറത്തിറക്കാന്‍ ഇടപെടണമെന്ന് ആവശ്യപ്പെട്ടായിരുന്നു മുകേഷിന് ഫോണ്‍കോള്‍. ഇ ബുള്‍ജെറ്റ് എന്ന് കേട്ടിട്ടു പോലും ഇല്ലാത്ത മുകേഷ് ആദ്യമൊന്ന് നടുങ്ങി. എന്താണ് സംഭവമെന്ന് അറിയാതെ മുകേഷ് പലതവണ കാര്യങ്ങള്‍ തിരക്കുന്നുണ്ടായിരുന്നു.

ഇ ബുള്‍ജെറ്റ് എന്നാണ് ഫോണ്‍ വിളിച്ച യുവാവ് പറയുന്നത്. എന്നാല്‍, മുകേഷ് കേള്‍ക്കുന്നത് ഇ ബുള്ളറ്റ് എന്നും. വിളിച്ചയാള്‍ കോതമംഗലത്ത് നിന്നാണെന്ന് പറയുമ്പോള്‍ 'കോതമംഗലം ഓഫീസില്‍ പറയൂ,' എന്നാണ് മുകേഷിന്റെ പ്രതികരണം. ഈ സംഭാഷണങ്ങള്‍ സോഷ്യല്‍ മീഡിയയില്‍ വൈറലായതോടെ മുകേഷ് രസകരമായ ഒരു ട്രോളുമായി രംഗത്തെത്തി.

ഇതാണ് മുകേഷ് പങ്കുവച്ച ട്രോള്‍, 'ഓരോരോ മാരണങ്ങളെ..' എന്ന ക്യാപ്ഷനോടെയാണ് മുകേഷ് ട്രോള്‍ പങ്കുവച്ചിരിക്കുന്നത്.

ഇ ബുള്‍ജെറ്റ് സഹോദരങ്ങളെ പുറത്തിറക്കാന്‍ ഇടപെടണമെന്ന് ആവശ്യപ്പെട്ട് ഏതാനും യുവാക്കള്‍ സുരേഷ് ഗോപി എംപിയെയും വിളിച്ചിരുന്നു.