‘കാലാ’ - മമ്മൂട്ടി വേണ്ടെന്നുവച്ച ചിത്രം!

മമ്മൂട്ടി, രജനികാന്ത്, കാലാ, പാ രഞ്ജിത്, ദളപതി, മണിരത്നം, Mammootty, Rajinikanth, Kaala, Pa Renjith, Thalapathy, Maniratnam
BIJU| Last Modified തിങ്കള്‍, 19 മാര്‍ച്ച് 2018 (17:42 IST)
രജനികാന്തിന്‍റെ ഉടന്‍ റിലീസാകാനുള്ള ചിത്രം ‘കാലാ’ ഓരോ ദിവസവും വാര്‍ത്തകളില്‍ നിറയുകയാണ്. കബാലിക്ക് ശേഷം പാ രഞ്ജിത് സംവിധാനം ചെയ്യുന്ന സിനിമ രാഷ്ട്രീയവും അധോലോകവും വിഷയമാക്കുന്ന ത്രില്ലര്‍ ആണ്.

ഈ സിനിമ മലയാളത്തിന്‍റെ മെഗാതാരം മമ്മൂട്ടി വേണ്ടെന്നുവച്ചതാണെന്ന് അറിയുമോ? അതാണ് സത്യം. പാ രഞ്ജിത് ഈ സിനിമയുടെ തിരക്കഥയുമായി മമ്മൂട്ടിയെ സമീപിച്ചിരുന്നു. ചര്‍ച്ചകളൊക്കെ നടന്നെങ്കിലും അത് വര്‍ക്കൌട്ടായില്ല. ആ സിനിമയില്‍ അഭിനയിക്കേണ്ട എന്നായിരുന്നു മമ്മൂട്ടിയുടെ തീരുമാനം.

രജനികാന്ത് നായകനാകുന്ന സിനിമയില്‍ വില്ലനാകാന്‍ വേണ്ടിയാണ് മമ്മൂട്ടിയെ ക്ഷണിച്ചതെന്ന് ഒരു ശ്രുതിയുണ്ട്. ഇപ്പോള്‍ നാനാ പടേക്കര്‍ അവതരിപ്പിക്കുന്ന കഥാപാത്രമായിരുന്നുവത്രേ മമ്മൂട്ടിക്കായി സംവിധായകന്‍ ആലോചിച്ചത്. എന്നാല്‍ രജനികാന്തിന്‍റെ വില്ലനാകാന്‍ താനില്ലെന്ന നിലപാടിലായിരുന്നു മമ്മൂട്ടി എന്നാണ് അണിയറയില്‍ പ്രചരിക്കുന്ന കാര്യം.

‘കാലാ’യില്‍ അഭിനയിച്ചില്ലെങ്കിലും ഒരു മമ്മൂട്ടിച്ചിത്രം ചെയ്യാന്‍ ആഗ്രഹമുണ്ടെന്ന് പാ രഞ്ജിത് തുറന്നുപറയുന്നു. തിരുനെല്‍‌വേലിയില്‍ നിന്ന് മുംബൈയിലേക്ക് കുട്ടിക്കാലത്ത് നാടുവിട്ടെത്തുകയും അവിടെ ഡോണ്‍ ആയി മാറുകയും ചെയ്ത കാലായുടെ കഥയാണ് ഈ സിനിമ പറയുന്നത്.

ഹ്യുമ ഖുറേഷിയാണ് ചിത്രത്തിലെ നായിക. സമുദ്രക്കനി, ജാക്കി ഷ്‌റോഫ്, സുകന്യ, സമ്പത്ത്, സായജി ഷിന്‍‌ഡെ തുടങ്ങിയ പ്രമുഖരും ചിത്രത്തില്‍ അണിനിരക്കുന്നു. ധനുഷാണ് ചിത്രം നിര്‍മ്മിക്കുന്നത്. അടുത്തമാസം പ്രദര്‍ശനത്തിനെത്തും.



ഇതിനെക്കുറിച്ച് കൂടുതല്‍ വായിക്കുക :