ടി20 ക്രിക്കറ്റിൽ ഏറ്റവും വേഗത്തിൽ 1,500 റൺസ് തികക്കുന്ന താരങ്ങളുടെ പട്ടികയിൽ ഇടം നേടി പാകിസ്ഥാൻ ക്യാപ്‌റ്റൻ ബാബർ അസം. കഴിഞ്ഞ ദിവസം ഇംഗ്ലണ്ടിനെതിരെ നടന്ന രണ്ടാം ടി20 മത്സരത്തിലാണ് ബാബർ 1,500 റൺസ് കടന്നത്. 39 ഇന്നിങ്‌സുകളിൽ നിന്നാണ് ബാബർ ഈ നേട്ടത്തിലെത്തിയത്.

ഇതോടെ ടി20യിൽ ഏറ്റവും വേഗത്തിൽ 1,500 റൺസ് പിന്നിടുന്ന താരങ്ങളുടെ പട്ടികയിൽ ഇന്ത്യൻ നായകൻ വിരാട് കോഹ്‌ലി, ഓസീസ് താരം ആരോണ്‍ ഫിഞ്ച് എന്നിവർക്കൊപ്പം ബാബറും ഇടം നേടി. 3 പേരും 39 ഇന്നിങ്‌സിൽ നിന്നാണ് ഈ നേട്ടം കൈവരിച്ചത്. എന്നാൽ ഇന്ത്യൻ നായകൻ കോലിയേക്കാൾ ഉയർന്ന ബാറ്റിങ് ശരാശരിയാണ് ടി20യിൽ ബാബറിനുള്ളത്. 50.90 ആണ് ബാബറിന്റെ ബാറ്റിംഗ് ശരാശരി. നേരത്തെ 50.80 ശരാശരിയുമായി കോഹ്‌ലിയായിരുന്നു മുന്നില്‍.