BIJU|
Last Modified ബുധന്‍, 30 മെയ് 2018 (15:29 IST)
മോഹന്‍ലാല്‍ ചിത്രമായ ‘കാസനോവ’ കണ്ടവരോട് ക്ഷമ ചോദിക്കുന്നതായി ചിത്രത്തിന്‍റെ സംവിധായകന്‍ റോഷന്‍ ആന്‍ഡ്രൂസ്. നല്ല രീതിയില്‍ പൊട്ടിയ സിനിമയാണെങ്കിലും ആ സിനിമയുടെ നിര്‍മ്മാതാവ് സാമ്പത്തിക ഭദ്രതയുള്ള ആളായതിനാല്‍ പ്രശ്നമൊന്നും പറ്റിയില്ലെന്നും ഒരു അഭിമുഖത്തില്‍ റോഷന്‍ ആന്‍ഡ്രൂസ് പറയുന്നു.
നിര്‍മ്മാതാവിന് കുഴപ്പമില്ലെങ്കിലും ആ സിനിമ പണം കൊടുത്ത് തിയേറ്ററില്‍ പോയി കണ്ടവരോട് ക്ഷമ ചോദിക്കുകയാണ്. ആ സിനിമ മോശമായതിന്‍റെ പൂര്‍ണ ഉത്തരവാദിത്തവും സംവിധായകനായ എനിക്കും തിരക്കഥാകൃത്തുക്കള്‍ക്കുമാണ്. ഞങ്ങള്‍ ആ പരാജയം ഒരുമിച്ച് ഏറ്റെടുക്കുകയും ചെയ്തു - റോഷന്‍ വ്യക്തമാക്കുന്നു.
മുംബൈ പൊലീസ്, ഹൌ ഓള്‍ഡ് ആര്‍ യു തുടങ്ങിയ സിനിമകള്‍ നന്നാവാന്‍ കാരണം കാസനോവയാണ്. ആ സിനിമയുടെ പരാജയത്തില്‍ നിന്നും ആ സിനിമയുടെ മേക്കിങ്ങില്‍ നിന്നും ഒരുപാട് കാര്യങ്ങള്‍ പഠിച്ചതായും റോഷന്‍ ആന്‍ഡ്രൂസ് വെളിപ്പെടുത്തുന്നു.
