കൊല നടക്കുന്നിടത്ത് സാക്ഷി പറയാന്‍ കവി എത്തില്ല: ഒഎന്‍വി
തിരുവനന്തപുരം|
WEBDUNIA|
PRO
കൊല നടക്കുന്നയിടങ്ങളില്‍ സാക്ഷി പറയാന്‍ കവി എത്തണമെന്ന് പറയുന്നത് മൗഢ്യമാണെന്ന് കവി ഒ എന് വി കുറുപ്പ്. ആരെയും ഭയമില്ലാത്ത അവസ്ഥയിലേക്ക് കവിത കവിയെ കൊണ്ടെത്തിക്കുന്നുവെന്നും ആരോപണങ്ങളിലുടെ വിജയം നേടാനാകുമെന്ന് കരുതുന്നവര്‍ ആ തെറ്റിദ്ധാരണ മാറ്റുന്നതാണ് നല്ലതെന്നും അദ്ദേഹം പറഞ്ഞു.
ടി പി ചന്ദ്രശേഖരന് വധത്തേക്കുറിച്ച് ജ്ഞാനപീഠ ജേതാക്കളായ സാഹിത്യനായകര്‍ പോലും പ്രതികരണം നടത്താത്തത് വിമര്‍ശനങ്ങള്‍ക്ക് ഇടയാക്കിയിരുന്നു. ഇതിനോട് പ്രതികരിച്ചുകൊണ്ട് തിരുവനന്തപുരത്ത് ഒരു ഉദ്ഘാടനച്ചടങ്ങില്‍ സംസാരിക്കുകയായിരുന്നു ഒ എന് വി.
വാദിക്കുവേണ്ടിയോ പ്രതിക്കുവേണ്ടിയോ കോടതിയില്‍ സാക്ഷി പറയുന്നതുപോലെ കൊല നടക്കുന്നയിടങ്ങളില്‍ സാക്ഷി പറയാന്‍ കവി എത്തണമെന്ന് പറയുന്നത് മൗഢ്യമാണ്. കവിയെ കവിയായി കാണാന്‍ കഴിയാത്തവര്‍ക്കു മുന്നില്‍ കവിത ചൊല്ലാനാവില്ല. ഹത്യയെക്കാള്‍ ക്രൂരമാണ് വ്യക്തിഹത്യയെന്നും സര്‍ക്കാര്‍ പത്രക്കുറിപ്പ് ഇറക്കുന്നതുപോലെ കവിക്ക് പ്രതികരിക്കാനാകില്ലെന്നും ഒ എന് വി പറഞ്ഞു.
സാഹിത്യനായകരുടെ വാക്കുകളെ കക്ഷിരാഷ്ട്രീയത്തിന്‍റെ ദുര്‍വ്യാഖ്യാനത്തിന് ഉപയോഗിക്കരുത്. അകാലത്തില്‍ ഒരു സ്ത്രീക്കുണ്ടാകുന്ന വൈധവ്യത്തില്‍ കവിയും ദുഃഖിതനാകും. ഇത് മനസ്സിലാക്കാത്തവര്‍ അന്ധരാണെന്നും ഒ എന് വി വിമര്‍ശിച്ചു.
