സംസ്ഥാനത്തെ ഏഴു ജില്ലകളിലേക്ക് ഇന്ന് നടക്കുന്ന തദ്ദേശസ്വയംഭരണ സ്ഥാപനങ്ങളിലേക്കുള്ള തെരഞ്ഞെടുപ്പില്‍ മികച്ച പോളിംഗ്. വോട്ടെടുപ്പ് അന്തിമഘട്ടത്തോട് അടുക്കുമ്പോള്‍ 66 ശതമാനമാണ് സംസ്ഥാനത്ത് രേഖപ്പെടുത്തിയ പോളിംഗ് ശതമാനം.

തിരുവനന്തപുരം, കൊല്ലം, ഇടുക്കി, കോഴിക്കോട്, വയനാട്, കണ്ണൂർ, കാസർകോട് ജില്ലകളിലായി 1.11 കോടി വോട്ടർമാരാണ് പോളിംഗ് ബൂത്തിലെത്തുക. ഏഴ് ജില്ലകളിലായി 36,161 സ്ഥാനാർഥികളാണ് ജനവിധി തേടുന്നത്. വൈകിട്ട് അഞ്ചുവരെയാണ് പോളിംഗ് നടക്കുന്നത്. ഉച്ചയ്ക്ക് ശേഷം പോളിംഗ് ശതമാനം ഉയരുമെന്നാണ് പ്രതീക്ഷ.

തിരുവനന്തപുരം- 63, കൊല്ലം- 65 എന്നിങ്ങനെയാണ് തെക്കന്‍ ജില്ലകളിലെ പോളിംഗ്. മധ്യകേരളത്തില്‍ ഇടുക്കിയില്‍ മാത്രമാണ് ഇന്നു വോട്ടെടുപ്പ്. ജില്ലയില്‍ ഇതുവരെ 68 ശതമാനം പേര്‍ വോട്ട് രേഖപ്പെടുത്തി. കോഴിക്കോട്- 64, വയനാട്- 68, കണ്ണൂര്‍- 67, കാസര്‍ഗോഡ്- 69 എന്നിങ്ങനെയാണ് വടക്കന്‍ ജില്ലകളിലെ പോളിംഗ് ശതമാനം. കാസര്‍കോഡ് ജില്ലയിലാണ്‌ നിലവില്‍ ഏറ്റവും മികച്ച പോളിംഗ് രേഖപ്പെടുത്തിയിട്ടുള്ളത്.