ഓണ്ലൈനില് പഠിപ്പിക്കുന്ന അധ്യാപകരെ അവഹേളിക്കുന്നവര്ക്കെതിരെ ശക്തമായ നടപടിയെടുക്കുമെന്ന് കേരളാ പൊലീസ്
ഓണ്ലൈനില് പഠിപ്പിക്കുന്ന അധ്യാപകരെ അവഹേളിക്കുന്നവര്ക്കെതിരെ ശക്തമായ നടപടിയെടുക്കുമെന്ന് കേരളാ പൊലീസ്. ഈ മഹാമാരിയുടെ ഘട്ടത്തിലും വരുംതലമുറയുടെ വിദ്യാഭ്യാസത്തിനു വേണ്ടി ആവിഷ്ക്കരിച്ചിരിക്കുന്ന ബദല് സംവിധാനങ്ങളെയും അധ്യാപക സമൂഹത്തെയും അവഹേളിക്കുന്ന നടപടികള് ഭൂഷണമല്ലെന്നും നമ്മുടെ കുട്ടികളും ഇതൊക്കെ കണ്ട് വളരുന്നവരാണെന്ന ബോധ്യവും ഏവര്ക്കുമുണ്ടാകണമെന്നും കേരളാ പൊലീസ് ഫേസ്ബുക്കില് കുറിച്ചു.
കോവിഡ് വ്യാപനത്തെ തുടര്ന്ന് സ്കൂളുകളിലും മറ്റും ക്ളാസ്സുകള് ആരംഭിക്കാന് വൈകുന്നതിനാല് ഓണ്ലൈന് ക്ളാസ്സുകള് വഴി പഠനം നടക്കുകയാണ്. ചില ചാനലിലും ഓണ്ലൈന് പ്ലാറ്റ്ഫോമുകളിലും മറ്റും ക്ലാസ്സെടുക്കുന്ന അധ്യാപകരുടെ ചിത്രങ്ങളും വീഡിയോകളും ചില സാമൂഹ്യ വിരുദ്ധര് ദുരുപയോഗം ചെയ്ത് സോഷ്യല് മീഡിയ വഴി പ്രചരിപ്പിക്കുന്നതായി സൈബര് വിംഗിന്റെ ശ്രദ്ധയില്പ്പെട്ടിട്ടുണ്ട്. ഇത്തരക്കാര്ക്കെതിരെ ശക്തമായ നിയമനടപടികള് സ്വീകരിക്കുന്നതാണെന്ന് പൊലീസ് വ്യക്തമാക്കി.
