എം.ബി.രാജേഷ് സ്പീക്കറായി; ജയം 96 വോട്ടുകളോടെ
എം.ബി.രാജേഷ് 15-ാം കേരള നിയമസഭയുടെ സ്പീക്കറായി തിരഞ്ഞെടുക്കപ്പെട്ടു. 136 നിയമസഭാംഗങ്ങളാണ് സ്പീക്കര്‍ തിരഞ്ഞെടുപ്പില്‍ വോട്ട് ചെയ്തത്. ഇതില്‍ 96 വോട്ടുകള്‍ നേടിയാണ് രാജേഷ് വിജയിച്ചത്. യുഡിഎഫിന്റെ സ്പീക്കര്‍ സ്ഥാനാര്‍ഥിയായ പി.സി.വിഷ്ണുനാഥിന് 40 വോട്ടുകളാണ് കിട്ടിയത്. മുഖ്യമന്ത്രി പിണറായി വിജയനും പ്രതിപക്ഷ നേതാവ് വി.ഡി.സതീശനും ചേര്‍ന്ന് രാജേഷിനെ സ്പീക്കര്‍ കസേരയിലേക്ക് ആനയിച്ചു. പുതിയ സ്പീക്കറെ മുഖ്യമന്ത്രി അനുമോദിച്ചു. എല്ലാ മേഖലകളിലും കഴിവ് തെളിയിച്ച വ്യക്തിയാണ് രാജേഷ് എന്ന് മുഖ്യമന്ത്രി പറഞ്ഞു. കേരള നിയമസഭയുടെ 23-ാം സ്പീക്കറായാണ് രാജേഷ് ചുമതലയേറ്റത്.
