സംസ്ഥാനത്ത് ഡെങ്കി വ്യാപിക്കുന്നു; ഈ അപായ സൂചനകളെ അവഗണിക്കരുത്
സംസ്ഥാനത്ത് ഡെങ്കി വ്യാപിക്കുകയാണ്. ഇടവിട്ടുള്ള മഴയാണ് കാരണം. ഡെങ്കിപ്പനി മുമ്പ് വന്നിട്ടുള്ളവര്ക്ക് വീണ്ടും ബാധിച്ചാല് ആരോഗ്യനില സങ്കീര്ണമാകാന് സാധ്യതയുള്ളതിനാല് അതീവ ജാഗ്രത പാലിക്കണമെന്ന് ആരോഗ്യ വകുപ്പ് അറിയിച്ചിട്ടുണ്ട്. ഡെങ്കിപ്പനി ബാധിക്കുന്നവരില് ഭൂരിപക്ഷം പേരിലും രോഗ ലക്ഷണങ്ങള് കുറവായിരിക്കും. 5 ശതമാനം പേര്ക്ക് തീവ്രതയാകാന് സാധ്യതയുണ്ട്. അതിനാല് പലര്ക്കും ഒരിക്കലെങ്കിലും അറിയാതെ ഡെങ്കി വൈറസ് ബാധിച്ചിരിക്കാം എന്നാണ് ആഗോള തലത്തില് തന്നെ കണക്കാക്കപ്പെടുന്നത്. ഇവര്ക്ക് ഡെങ്കിപ്പനി രണ്ടാമതും ബാധിച്ചാല് ഗുരുതരമാകാം.
ചെറിയ പനി വന്നാല് പോലും ധാരാളം പാനീയങ്ങള് കുടിക്കുക. ക്ഷീണം മാറാനും നിര്ജലീകരണം ഒഴിവാക്കാനും പാനീയങ്ങള് ഏറെ സഹായിക്കും. തിളപ്പിച്ചാറ്റിയ കഞ്ഞി വെള്ളം നല്ലത്. വിശ്രമം വളരെ പ്രധാനമാണ്. മൂന്ന് ദിവസത്തിലധികം നീണ്ട് നില്ക്കുന്ന പനിയോ അപായ സൂചനകളോ കണ്ടാല് എന്തായാലും വിദഗ്ധ ചികിത്സ തേടണം. ശക്തമായ വയറുവേദന, നീണ്ടു നില്ക്കുന്ന ഛര്ദി, കഠിനമായ ക്ഷീണം, തൊലിപ്പുറത്തും മോണകളിലുമുള്ള ചുവന്ന പാടുകളോ രക്തസ്രാവമോ തുടങ്ങിയ അപായ സൂചനകള് കണ്ടാല് എത്രയും വേഗം വിദഗ്ധ ചികിത്സ തേടേണ്ടതാണ്.
