ദക്ഷിണ ഫ്രാന്‍സില്‍ ജര്‍മന്‍ യാത്രാവിമാനം തകര്‍ന്നുവീണുണ്ടായ അപകടത്തില്‍ വിമാനത്തിലെ മുഴുവന്‍ യാത്രക്കാരും മരിച്ചു. വിമാനം തകര്‍ന്നതായി സ്ഥിരീകരിച്ച ഫ്രാന്‍സ് പ്രസിഡന്റ് ഫ്രാന്‍സ്വ ഒലാദ് ആരും രക്ഷപ്പെട്ടിരിക്കാന്‍ സാധ്യതയില്ലെന്നും അറിയിച്ചു. അതേസമയം അപകടകാരണം ഇതുവരെയും വ്യക്തമായിട്ടില്ല.

വിമാനത്തിന്റെ ബ്ലാക്​ബോക്സ് കണ്ടെടുത്തിട്ടുണ്ട്. സ്‌പെയിനിലെ ബാഴ്‌സലോണയില്‍ നിന്ന് ജര്‍മനിയിലെ ഡസല്‍ഡോര്‍ഫിലേക്ക് പോവുകയായിരുന്ന ലുഫ്താന്‍സ ജര്‍മന്‍ വിങ്‌സിന്റെ 'എയര്‍ബസ് എ 329' ആണ് ദുരന്തത്തില്‍പ്പെട്ടത്. രണ്ടു പൈലറ്റുമാരടക്കം ആറ്​ജീവനക്കാരും 144 യാത്രക്കാരുമായിരുന്നു​വിമാനത്തില്‍ ഉണ്ടായിരുന്നത്​. ഇതില്‍ 42 പേരും സ്പെയിന്‍ പൌരന്മാരാണെന്നാണ് റിപ്പോര്‍ട്ട്.

ജര്‍മനി, സ്പെയിന്‍, തുര്‍ക്കി, ബെല്‍ജിയം എന്നിവിടങ്ങളില്‍ നിന്നുള്ളവരാണ്​വിമാനത്തില്‍ ഉണ്ടായിരുന്നത്​. ജര്‍മനിയില്‍ നിന്നുള്ള 67പേരും ജര്‍മന്‍കാരായ 18 വിദ്യാര്‍ത്ഥികളും മരിച്ചവരില്‍ ഉള്‍പ്പെടും. മോശം കാലാവസ്ഥയാണ്​വില്ലനായതെന്നാണ്​പ്രാഥമിക റിപ്പോര്‍ട്ടുകള്‍.

യൂറോപ്പിലെ മുന്‍നിര കമ്പനിയായ ലുഫ്താന്‍സയുടെ കീഴിലുള്ള ജര്‍മന്‍ വിങ്‌സിന്റേതാണ് വിമാനം. 24 വര്‍ഷം പഴക്കമുള്ള വിമാനം 1991 മുതല്‍ ലുഫ്താന്‍സ ഉപയോഗിക്കുന്നതാണ്. 5000 അടി ഉയരത്തില്‍ നിന്നാണ് വിമാനം തകര്‍ന്നത്. അപകടത്തെ തുടര്‍ന്ന് ലുഫ്താന്‍സയുടെ നിരവധി സര്‍വീസുകള്‍ റദ്ദാക്കി.