ഹേമ കമ്മിറ്റി റിപ്പോര്ട്ട് പുറത്തുവിടരുതെന്ന് WCC ആവശ്യപ്പെട്ടു; വന് വെളിപ്പെടുത്തലുമായി മന്ത്രി പി.രാജീവ്
ഹേമ കമ്മിറ്റി റിപ്പോര്ട്ട് പുറത്തുവിടരുതെന്ന് WCC (വുമണ് ഇന് സിനിമ കളക്ടീവ്) ആവശ്യപ്പെട്ടെന്ന് നിയമമന്ത്രി പി.രാജീവ്. ഇംഗ്ലീഷ് ദിനപത്രം ഇന്ത്യന് എക്സ്പ്രസിന് നല്കിയ അഭിമുഖത്തിലാണ് മന്ത്രിയുടെ വെളിപ്പെടുത്തല്. ഹേമ കമ്മറ്റി റിപ്പോര്ട്ട് പുറത്തുവിടണമെന്നായിരുന്നു സിനിമാ മേഖലയിലെ സ്ത്രീ കൂട്ടായ്മയായ WCC നിരന്തരം ആവശ്യപ്പെട്ടുകൊണ്ടിരുന്നത്. ഇതിന് വിരുദ്ധമായ ആവശ്യം മന്ത്രിയോട് WCC ഉന്നയിച്ചുവെന്നാണ് അഭിമുഖത്തില് പറയുന്നത്. 'ഹേമ കമ്മിറ്റി റിപ്പോര്ട്ടുമായി ബന്ധപ്പെട്ട് ഡബ്ല്യുസിസിയുമായി ഞാന് ചര്ച്ച നടത്തിയിരുന്നു. റിപ്പോര്ട്ട് പുറത്തുവിടരുതെന്ന് അവര് എന്നോട് പറഞ്ഞു', മന്ത്രി പി.രാജീവിനെ ഉദ്ധരിച്ച് പത്രം റിപ്പോര്ട്ട് ചെയ്തു.
