ഒരു നിര്‍മാതാവില്‍ നിന്ന് തനിക്കുണ്ടായ മോശം അനുഭവം തുറന്നുപറഞ്ഞ് ബോളിവുഡ് താരം മല്ലിക ഷെരാവത്ത്. 'നിന്റെ അരക്കെട്ടില്‍ ചപ്പാത്തി ചുടട്ടെ' എന്നാണ് ഒരു നിര്‍മാതാവ് പാട്ട് സീന്‍ ചിത്രീകരിക്കുന്നതിനിടെ തന്നോട് ചോദിച്ചതെന്ന് മല്ലിക ഷെരാവത്ത് പറഞ്ഞു. ദ ലവ് ലോഫ് ലൈവ് ഷോയില്‍ സംസാരിക്കുകയായിരുന്നു മല്ലിക.

സോങ് സീക്വന്‍സിനെ കുറിച്ച് ആലോചിക്കുന്ന സമയത്താണ് സിനിമയുടെ നിര്‍മാതാവ് തന്റെ അടുത്തേക്ക് വന്നതെന്ന് മല്ലിക ഷെരാവത്ത് പറയുന്നു. 'ഇത് വളരെ ഹോട്ടായുള്ള ഒരു പാട്ടാണ്. നിങ്ങള്‍ ഹോട്ടാണെന്ന് എങ്ങനെയാണ് പ്രേക്ഷകര്‍ക്ക് തോന്നുക? നിങ്ങള്‍ വളരെ ഹോട്ടാണ്. നിങ്ങളുടെ അരക്കെട്ടില്‍ ഒരാള്‍ക്ക് ചപ്പാത്തി ചുടാന്‍ സാധിക്കും,' നിര്‍മാതാവ് തന്നോട് പറഞ്ഞതായി മല്ലിക വെളിപ്പെടുത്തി. ഇങ്ങനെയൊരു സീന്‍ പാട്ടില്‍ ചേര്‍ക്കാമെന്നാണ് നിര്‍മാതാവ് മല്ലികയോട് ചോദിച്ചത്. എന്നാല്‍, താന്‍ 'നോ' പറയുകയായിരുന്നെന്ന് മല്ലിക വ്യക്തമാക്കി. അങ്ങനെയൊരു സീന്‍ ചെയ്യാന്‍ താന്‍ തയ്യാറല്ലെന്നാണ് മല്ലിക നിര്‍മാതാവിനോട് പറഞ്ഞത്. പിന്നീട് ചിന്തിച്ചപ്പോള്‍ നിര്‍മാതാവ് പറഞ്ഞത് ഒരു തമാശയായി തനിക്ക് തോന്നിയെന്നും താരം കൂട്ടിച്ചേര്‍ത്തു.