‘ഇന്ത്യന്‍ ഫുട്‌ബോള്‍ ടീം ലോകകപ്പ്‌ ഫൈനലിലെത്തും‘ :സച്ചിന്‍
മുംബൈ|
WEBDUNIA|
Last Modified ബുധന്‍, 29 മെയ് 2013 (10:11 IST)
PRO
ഇന്ത്യന്‍ ഫുട്‌ബോള്‍ ടീം ലോകകപ്പ്‌ ഫൈനല്‍ റൗണ്ടില്‍ കളിക്കുമെന്ന് മാസ്‌റ്റര്‍ ബ്ലാസ്‌റ്റര്‍ സച്ചിന്‍ തെണ്ടുല്‍ക്കര്‍. 2022 ല്‍ ഖത്തറില്‍ അരങ്ങേറുന്ന ഫിഫ ലോകകപ്പിലെ ഫൈനല്‍ റൗണ്ടില്‍ കടക്കാന്‍ ഇന്ത്യന്‍ ടീമിനു കഴിയുമെന്നാണ്‌ താന്‍ വിശ്വസിക്കുന്നതെന്നും സച്ചിന്‍ പറഞ്ഞു.
പതിനഞ്ചു വയസില്‍ താഴെയുള്ളവരുടെ ജൂനിയര്‍ ഫുട്‌ബോള്‍ ജേതാക്കള്‍ക്ക്‌ പുരസ്‌കാര വിതരണം നടത്തുന്നതിനിടെയാണ്‌ സച്ചിന്‍ തന്റെ പ്രതീക്ഷകള്‍ പങ്കുവച്ചത്‌. 2022 ലെ ലോകകപ്പില്‍ കളിക്കാന്‍ യോഗ്യത നേടുകയെന്നതാവണം ലക്ഷ്യമെന്ന്‌ ജൂനിയര്‍ താരങ്ങള്‍ക്ക് സച്ചിന്‍ ഉപദേശവും നല്‍കി.
മുതിര്‍ന്ന താരങ്ങളുടെ ഉപദേശം തേടുകയും മികച്ച കളി കെട്ടഴിച്ച്‌ സ്വപ്‌നങ്ങള്‍ യാഥാര്‍ഥ്യമാക്കാന്‍ പരിശ്രമിക്കുകയും ചെയ്‌താല്‍ ലക്ഷ്യം അകലെയാവില്ലെന്നും സച്ചിന്‍ പറഞ്ഞു. മത്സരമേതായാലും അതിനെ ഉത്സാഹത്തോടെ സമീപിക്കുന്നപക്ഷം വിജയം താനേ വന്നുകൊള്ളുമെന്നും മാസ്‌റ്റര്‍ ബ്ലാസ്‌റ്റര്‍ കൂട്ടിച്ചേര്‍ത്തു.
