Last Modified ബുധന്‍, 28 ഓഗസ്റ്റ് 2019 (17:39 IST)
പോഷക സമൃദ്ധിയുടെ കാര്യത്തിലും ആരോഗ്യ സംരക്ഷണത്തിന്‍റെ കാര്യത്തിലും മുരിങ്ങ ഏറെ മുന്നിലാണ്‌. അതുപോലെ തന്നെ മുട്ടയും. നാവിന്‍റെ രുചി മാത്രമല്ല, ആരോഗ്യവും സംരക്ഷിക്കുമെന്ന്‌ സാരം.
മുട്ട ഇട്ട മുരിങ്ങത്തോരൻ കഴിച്ച് നോക്കിയിട്ടുണ്ടോ? ഉണ്ടാക്കുന്നതെങ്ങനെ എന്ന് നോക്കാം.
ആവശ്യമുള്ള ഇനങ്ങള്‍:
മുരിങ്ങപ്പൂ അരിഞ്ഞത്‌ - 2 കപ്പ്‌
ചുവന്നുള്ളി - 1 ടേബിള്‍ സ്‌പൂണ്‍
പച്ചമുളക്‌ - 4 എണ്ണം
കടുക്‌ - 1 സ്‌പൂണ്‍
ഗരം മസാല - 1/4 സ്‌പൂണ്‍
തേങ്ങ ചിരകിയത്‌ - 1 1/2 ടേബിള്‍ സ്‌പൂണ്‍
കറിവേപ്പില - പാകത്തിന്‌
എണ്ണ - 1 ടേബിള്‍ സ്‌പൂണ്‍
ഉപ്പ്‌ - പാകത്തിന്‌
മുട്ട - 2 എണ്ണം
പാകം ചെയ്യേണ്ട വിധം:
ഒരു പാത്രത്തില്‍ നാലുകപ്പ്‌ വെള്ളം ഒഴിച്ച് അടുപ്പത്ത്‌ വയ്ക്കുക. വെട്ടിത്തിളയ്ക്കുമ്പോള്‍ അരിഞ്ഞുവച്ച മുരിങ്ങപ്പൂവിട്ട് മൂടി വയ്ക്കുക. അഞ്ചു മിനിറ്റ്‌ കഴിഞ്ഞ് ഇറക്കി വെള്ളം വാര്‍ത്തു കളയുക. ചീനച്ചട്ടി അടുപ്പില്‍ വെച്ച്‌ എണ്ണയൊഴിക്കുക. കടുക്‌ ഇട്ട്‌ പൊട്ടുമ്പോള്‍ ചുവന്നുള്ളിയും പച്ചമുളകുമിട്ട്‌ ഇളക്കുക. മുട്ട പൊട്ടിച്ച് ഒഴിച്ച് നന്നായി ഇളക്കുക. ഇതിനു മുകളിലേക്ക് മസാലയും നാളികേരം ചിരകിയതും ചേര്‍ത്ത്‌ ഇളക്കി മുരിങ്ങപ്പൂവും ചേര്‍ത്ത്‌ യോജിപ്പിക്കുക. വെള്ളം വറ്റുമ്പോള്‍ ഇറക്കിവയ്ക്കുക.
