ഭർത്താവിനെ ഉപേക്ഷിച്ച് ടിക് ടോക്കിലൂടെ പരിചയപ്പെട്ട കൂട്ടുകാരിക്കൊപ്പം യുവതി ഒളിച്ചോടി. തമിഴ്‌നാട്ടിലെ ശിവഗംഗ ദേവക്കോട്ടയിൽ കഴിഞ്ഞ ദിവസമായിരുന്നു സംഭവം. വിനീത (19) എന്ന യുവതിയാണ് തിരുപ്പൂർ സ്വദേശിനിയായ അഭിക്കൊപ്പം പോയത്.

വീട്ടില്‍ സൂക്ഷിച്ചിരുന്ന സഹോദരിയുടെ 25 പവന്‍ സ്വര്‍ണവും വിനീത കൊണ്ടു പോയി. യുവതിയുടെ മാതാപിതാക്കള്‍ തിരുവേകമ്പത്തൂർ പൊലീസ് സ്‌റ്റേഷനില്‍ പരാതി നല്‍കിയതോടെയാണ് വിവരം പുറത്തായത്.
ഈ വർഷം ജനുവരിയിലാണ് ലിയോ എന്ന യുവാവുമായി വിനീതയുടെ വിവാഹം കഴിഞ്ഞത്. ജോലി ശരിയായതോടെ വിവാഹ ശേഷം യുവാവ് സിങ്കപ്പൂരിലേക്ക് പോയി.

ഭര്‍ത്താവ് പോയതിന് പിന്നാലെ വിനീത ടിക് ടോക് വീഡിയോകള്‍ ചെയ്യാന്‍ ആരംഭിച്ചു. തുടര്‍ന്നാണ് അഭിയെ പരിചയപ്പെട്ടതും ബന്ധം ദൃഡമായതും. വിനീതയുടെ വീട്ടിലേക്ക് അഭി സ്ഥിരമായി എത്തിയിരുന്നു. ഇതിനിടെ
വിദേശത്ത് നിന്ന് ലിയോ അയച്ചു നല്‍കിയ പണവും വീട്ടിലുണ്ടായിരുന്ന 20 പവനോളം സ്വർണവും ഇരുവരും ചേർന്ന് ധൂർത്തടിച്ചു.

ആര്‍ഭാട ജീവിതം നയിക്കുന്ന തരത്തിലുള്ള വീഡിയോകള്‍ പതിവായതോടെ സംശയം തോന്നിയ ലിയോ ഈ മാസം 19-ന് നാട്ടിലെത്തി. താലിമാലയടക്കം കാണാതിരിക്കുകയും അഭിയുടെ ചിത്രം വിനീത കയ്യില്‍ പച്ച കുത്തിയിരിക്കുന്നതും കണ്ടതോടെ യുവാവ് അത് ചോദ്യം ചെയ്തു.

ഭാര്യയുമായി അസ്വാരസ്യം ശക്തമായതോടെ വിനീതയെ സ്വന്തം വീട്ടിലേക്ക് ലിയോ പറഞ്ഞു വിട്ടു. മാതാപിതാക്കള്‍ ഉപദേശിച്ചെങ്കിലും എതിര്‍പ്പ് പ്രകടിപ്പിച്ച വിനീത രണ്ടുദിവസത്തിനുശേഷം മുതിർന്ന സഹോദരിയുടെ 25 പവൻ സ്വർണവുമായി കടന്നു കളയുകയായിരുന്നു.