കോണ്‍ഗ്രസ് അധ്യക്ഷ സോണിയ ഗാന്ധിയെ കണ്ട് അഴിമതി തടയാന്‍ പഠിക്കണമെന്ന് മേനക ഗാന്ധി. പിലിബിത്തില്‍ അഴിമതിയെക്കുറിച്ചുള്ള ചോദ്യങ്ങളോട് പ്രതികരിക്കവെ ആയിരുന്നു അകല്‍ച്ചയില്‍ കഴിയുന്ന ഭര്‍തൃസഹോദര ഭാര്യയെ പുകഴ്ത്തി മേനക രംഗത്തെത്തിയത്. ബി ജെ പി നേതാവ് കൂടിയായ മേനകയുടെ ഭാഗത്തു നിന്ന് ഉണ്ടായ ഈ അഭിനന്ദനം കോണ്‍ഗ്രസിന് മൊത്തത്തില്‍ പുതിയ ഉണര്‍വ് നല്കിയിരിക്കുകയാണ്.

പഴയ ഒരു സംഭവം ചൂണ്ടിക്കാട്ടിയാണ് മേനക സോണിയയെ പുകഴ്ത്തിയത്. ഒരിക്കൽ സോണിയയുടെ ബന്ധു ഒരു കട തുടങ്ങി. ഇതിന്‍റെ പരസ്യത്തിനായി സോണിയയുടെ പേര് കടയുടമ ദുരുപയോഗം ചെയ്തു. എന്നാല്‍, ഇതിനെ അംഗീകരിക്കാതിരുന്ന സോണിയ പത്രത്തിലൂടെ പരസ്യം ചെയ്തുകൊണ്ടാണ് ഇതിനെതിരെ പ്രതികരിച്ചത്.

ഒരു സഹായത്തിന് വേണ്ടിയും അയാളെ സമീപിക്കരുതെന്ന് പരസ്യത്തിലൂടെ സോണിയ ജനങ്ങൾക്ക് മുന്നറിയിപ്പ് നൽകുകയും ചെയ്തു. സ്വജന പക്ഷപാതത്തിനെതിരെ സോണിയ സ്വീകരിച്ച ഈ മാതൃക അനുകരണീയമാണെന്നും മേനക പറഞ്ഞു.

തങ്ങളെ ഉപയോഗിച്ച് അഴിമതി നടത്തുന്നവരെ ഇത്തരത്തിൽ പ്രതിരോധിക്കാം. ആവശ്യമെങ്കിൽ സർക്കാർ ഉദ്യോഗസ്ഥർക്കെതിരെ വിജലൻസിനെ സമീപിക്കാമെന്നും തന്‍റെ നിയോജക മണ്ഡലത്തിലെ ജനങ്ങളോട് മേനക പറഞ്ഞു.