മൂന്നുമാസം മുന്‍പ് മരിച്ചയാളുടെ മൃതദേഹം ദുരൂഹതയെതുടര്‍ന്ന് പോസ്റ്റുമോര്‍ട്ടം ചെയ്യുന്നു. കഴിഞ്ഞ മാര്‍ച്ച് ആറിന് പൊഴിയൂരില്‍ മരിച്ച പരുത്തിയൂര്‍ ജോണിന്റെ മൃതദേഹമാണ് പുറത്തെടുത്ത് പരിശോധന നടത്തുന്നത്. ജോണിന്റെ സഹോദരിയുടെ പരാതിയുടെ അടിസ്ഥാനത്തിലാണ് നടപടി. ജോണിന്റെ മരണദിവസം ഇയാളുടെ കുടുംബം മറ്റുബന്ധുക്കളെ മൃതദേഹത്തിനരികെ പ്രവേശിക്കാന്‍ അനുവദിക്കാതിരുന്നതും പെട്ടെന്നുതന്നെ മൃതദേഹം സംസ്‌കരിച്ചതുമാണ് സംശയകാരണം.

ജോണിന് ഹൃദയാഘാതമായിരുന്നെന്നാണ് ജോണിന്റെ ഭാര്യയും മക്കളും ബന്ധുക്കളോട് പറഞ്ഞത്. എന്നാല്‍ പിന്നീട് ജോണ്‍ ആത്മഹത്യ ചെയ്യുകയായിരുന്നെന്നാണ് ഇവര്‍ പറഞ്ഞത്. ഓരോ സംശയത്തിനും പരസ്പര വിരുദ്ധമായ കാര്യങ്ങളാണ് ഇവര്‍ പറയുന്നത്. ഇതില്‍ സംശയം തോന്നിയാണ് സഹോദരി പൊലീസിനു പരാതി നല്‍കിയത്.