നാലുമാസം ഗര്‍ഭിണിയായ യുവതിയെ പുനലൂരിലെ വീട്ടില്‍ തൂങ്ങിമരിച്ച നിലയില്‍ കണ്ടെത്തി.കല്ലാര്‍ സ്വദേശി ശരണ്യ ആണ് മരിച്ചത്. 23 വയസ്സായിരുന്നു പ്രായം. ഇന്ന് പുലര്‍ച്ചയായിരുന്നു ശരണ്യയെ തൂങ്ങിമരിച്ച നിലയില്‍ വീട്ടിനുള്ളില്‍ കണ്ടെത്തിയത്. ഒന്നരവര്‍ഷം മുമ്പാണ് കൊട്ടാരക്കര പുത്തൂര്‍ സ്വദേശി അഖിലുമായി ശരണ്യയുടെ വിവാഹം നടന്നത്.

മാതാപിതാക്കള്‍ക്കൊപ്പം ഇന്നലെ രാത്രി ഉറങ്ങാന്‍ കിടന്നതായിരുന്നു ശരണ്യ. പുലര്‍ച്ചെ ഒരുമണിയോടെ മറ്റൊരു റൂമിലേക്ക് മാറിക്കിടന്നു. രാവിലെ ചായയുമായി എത്തി മകളെ വിളിക്കാന്‍ നോക്കിയ അമ്മയാണ് വാതില്‍ അകത്തുനിന്ന് അടച്ചതായി കണ്ടത്. തുടര്‍ന്ന് അയല്‍ക്കാരുടെ സഹായത്തോടെ വാതില്‍ ചവിട്ടി തുറന്നപ്പോള്‍ ഫാനില്‍ തൂങ്ങിയ നിലയിലാണ് ശരണ്യയെ കണ്ടത്.

പുനലൂര്‍ താലൂക്ക് ആശുപത്രിയില്‍ ഉടനെ എത്തിച്ചെങ്കിലും മരണം സംഭവിച്ചിരുന്നു. അഖിലുമായുള്ള പ്രണയത്തെ തുടര്‍ന്നായിരുന്നു ശരണ്യയുടെ വിവാഹം. ഭര്‍ത്താവുമായുള്ള പിണക്കത്തെ തുടര്‍ന്ന് മൂന്നു ദിവസങ്ങള്‍ക്ക് മുമ്പാണ് ശരണ്യ പുനലൂരിലുള്ള മാതാപിതാക്കളുടെ വീട്ടിലേക്ക് എത്തിയത്.

അസ്വാഭാവിക മരണത്തിന് പുനലൂര്‍ പൊലീസ് കേസെടുത്ത് അന്വേഷണം ആരംഭിച്ചു.