ചന്തയില്‍ പോത്തിനെ വില്‍ക്കാനെത്തിയ പതിമൂന്നുകാരന്‍ പിടിയില്‍. പന്തളം സ്വദേശിയായ 13കാരനാണ്‌ നൂറനാട്‌ പൊലീസിന്റെ പിടിയിലായത്. പോത്തിനെ മോഷ്ടിച്ചു കൊണ്ടുവന്നു എന്ന് സംശയം തോന്നിയതിനാലാണ് ഇയാള്‍ പിടിയിലായത്.
ചൊവ്വാഴ്ച രാവിലെ ചാരുംമൂട്‌ ചന്തയില്‍ പോത്തിനെ വിലക്കാന്‍ ശ്രമിക്കുന്നതിനിടയില്‍ സംശയം തോന്നിയ കച്ചവടക്കാര്‍ ചോദ്യം ചെയ്യുകയും പിന്നീട്‌ പൊലീസിനെ വിളിക്കുകയുമായിരുന്നു. 13കാരനൊപ്പമുണ്ടായിരുന്ന മറ്റ്‌ രണ്ടുപേര്‍ ഓടിരക്ഷപ്പെട്ടതായും കച്ചവടക്കാര്‍ പറഞ്ഞു.
തുടര്‍ന്ന് പൊലീസ് നടത്തിയ ചോദ്യം ചെയ്യലില്‍ താന്‍ പോത്തിനെ മോഷ്ടിച്ചതാണെന്ന് ഇയാള്‍ സമ്മതിച്ചു. പന്തളം ഭാഗത്തുനിന്നാണ്‌ പോത്തിനെ മോഷ്ടിച്ചതെന്ന്‌ 13കാരന്‍ പൊലീസിനോട്‌ പറഞ്ഞു.
