കടലാമയ്ക്ക് സ്നേഹചുംബനം നല്‍കിയ ചൈനീസ് യുവാവ് ആശുപത്രിക്കിടക്കയിലായി. ചുംബനത്തിനിടെ ആമ യുവാവിന്റെ ചുണ്ട് കടിച്ചുമുറിക്കുകയായിരുന്നു. ചൈനയിലെ ഫ്യൂജിയന്‍ പ്രവിശ്യയിലാണ് സംഭവം.
ആമയെ വനത്തിലെ അരുവിയില്‍ വിട്ടയക്കുന്നതിന് മുന്നോടിയായിട്ടായിരുന്നു യുവാവ് ചുംബനം നല്‍കിയത്. കടലാമയുടെ തല പുറത്തേക്ക് പിടിച്ചായിരുന്നു ചുംബനം. ഇതിനിടെ ആമ യുവാവിന്റെ മേല്‍ചുണ്ടില്‍ കടിച്ചുതൂങ്ങി. ആമ പിടിവിടാന്‍ തയ്യാറായില്ല. തുടര്‍ന്ന് ആമയുമായി യുവാവിനെ ആശുപത്രിയില്‍ എത്തിച്ചു. ഏറെ പാ‍ടുപെട്ടാണ് യുവാവിനെ ആമയില്‍ നിന്ന് മോചിപ്പിച്ചത്.
വടക്കേ അമേരിക്കയിലെ ആക്രമണ സ്വഭാവമുള്ള കടലാമകളുടെ ഗണത്തില്‍ പെട്ട ആമയാണിതെന്നാണ് റിപ്പോര്‍ട്ട്.
ആമയ്ക്ക് ‘ഗുഡ്‌ബൈ കിസ്’ നല്‍കി പണികിട്ടിയ യുവാവിന്റെ ചിത്രം സോഷ്യല്‍ മീഡിയയില്‍ പ്രചരിക്കുന്നുണ്ട്.
