അച്ചാറില്ലാതെ ചോറുകഴിക്കാൻ മടിയുള്ളാവരാണ് മലയാളികൾ. നാരങ്ങയിലും മാങ്ങയിലും തുടങ്ങി മീനും ബീഫും വരെ അച്ചാറിട്ട് കഴിക്കുന്നവരാണ് നമ്മൾ. എന്നാൽ നിത്യേനെയുള്ള ഈ അച്ചാറ്‌ തീറ്റ ആരോഗ്യത്തിന് നല്ലതാണോ ? അല്ല എന്നതാണ് ശരി. നിത്യവും അച്ചാറ് കഴിക്കുന്നത്‌ നമ്മളെ നിത്യരോഗികളാക്കി മാറ്റും. അൾസറിൽ തുടങ്ങി ഇത് ക്യാൻസറിന് വരെ കാരണമായേക്കാം.

അൾസറിന് പോലുള്ള പ്രശ്നങ്ങൾക്ക് പ്രധാന കാരണം അച്ചാറിന്റെ അമിത ഉപയോഗമാണ്. രാത്രികാലങ്ങളിൽ പുളിയുള്ള ഭക്ഷണം കൂടുതലായി കഴിക്കുകയാണെങ്കിൽ ദഹനം നടക്കുമ്പോൾ അമിതമായ അസിഡ് ഉൽപ്പാദിപ്പിക്കപ്പെടുകയും അത് വയറിന് കൂടുതൽ പ്രശ്‌നങ്ങൾ ഉണ്ടാക്കുന്നതിന് കാരണമാകുകയും ചെയ്യും. വയറുവേദന, നെഞ്ചെരിച്ചിൽ തുടങ്ങിയ പ്രശ്‌നങ്ങളും അച്ചാറിന്റെ അമിതമായ ഉപയോഗം കാരണമാകും. ഗ്യാസ്ട്രൈറ്റിസ് ഉള്ളവർ അച്ചാറുകൾ ഒഴിവാക്കുന്നതാണ് ഉത്തമം.

ഉയർന്ന അളവിൽ ഉപ്പ് ഉപയോഗിക്കുന്നതും പ്രശ്‌നമാണ്. അച്ചാറുകൾ കേടായിപ്പോകാതിരിക്കാൻ ആവശ്യത്തിലധികം ഉപ്പ് ചേർക്കും. ഉപ്പിന്റെ അമിതമായ ഉപയോഗം രക്തസമ്മർദത്തിനും ഹൃദയസംബന്ധിയായ രോഗങ്ങൾക്കും കാരണമാകും. അമിതമായി അച്ചാർ ഉപയോഗിച്ചാൽ ചിലരില്‍ താൽക്കാലികമായി രക്തസമ്മർദം കൂടാനിടയുണ്ട്. ഇത് കിഡ്നിയുടെ ആരോഗ്യത്തെ സാരമായി തന്നെ ബാധിയ്ക്കാം.