വെട്രിമാരൻ - സൂര്യ കൂട്ടുകെട്ടിൽ വരാനിരിക്കുന്ന ചിത്രമായ വാടിവാസലിനായി ആരാധകർ ആകാംക്ഷയോടെ കാത്തിരിക്കുകയാണ്. ഇരുവരും ആദ്യമായാണ് ഒന്നിക്കുന്നത്. അടുത്തവർഷം ഷൂട്ടിംഗ് ആരംഭിക്കാനിരിക്കുന്ന ചിത്രത്തേക്കുറിച്ച് ആരാധകർക്ക്
പ്രതീക്ഷകൾ ഏറെയാണ്.

ജി വി പ്രകാശ് ഇതിനോടകം തന്നെ വാടിവാസലിനായി കമ്പോസിംഗ് ആരംഭിച്ചുകഴിഞ്ഞു. സംഗീത സംവിധായകനെന്ന നിലയിൽ ഇത് അദ്ദേഹത്തിന്റെ എഴുപത്തഞ്ചാമത്തെ ചിത്രമാണ്. അതിനാൽ തന്നെ ഇതിൽ യൂണീക് സൗണ്ട് ഡിസൈൻ ഉണ്ടായിരിക്കുമെന്നും അദ്ദേഹം പറഞ്ഞു. ചിത്രത്തിനായി മികച്ച സ്ക്രിപ്റ്റ് ആണ് ഒരുക്കിയിരിക്കുന്നതെന്നും സിനിമ ഗംഭീരമായിരിക്കുമെന്നും ജി വി പ്രകാശ് ഒരു ഫാൻ ചാറ്റിനിടെ വെളിപ്പെടുത്തി.

തമിഴ്‌നാട്ടിലെ പുരാതന കായിക വിനോദമായ ജല്ലിക്കെട്ടിനെ അടിസ്ഥാനമാക്കിയാണ് ചിത്രം നിർമ്മിക്കുന്നത്. കലൈപുലി എസ് താണുവാണ് ചിത്രം നിർമ്മിക്കുന്നത്. തമിഴ് എഴുത്തുകാരൻ സി എസ് ചെല്ലപ്പ എഴുതിയ വാടിവാസൽ എന്ന നോവലിനെ ആധാരമാക്കിയാണ് സിനിമ.