സാമൂഹ്യ മാധ്യമങ്ങളില്‍ തനിക്കെതിരെ നടക്കുന്ന മോശം പരമാർശങ്ങൾക്കെതിരെ തുറന്നടിച്ച് നടി താര കല്യാണ്‍. മകള്‍ സൗഭാഗ്യയുടെ വിവാഹ വീഡിയോവിലെ ഒരു ഭാഗത്തെ സാമൂഹ്യ മാധ്യമങ്ങളിലൂടെ മോശമായ രീതിയിൽ പ്രചരിപ്പിച്ചതിനെതിരെയാണ് നടി രംഗത്തെത്തിയിരികുന്നത് ഫെബ്രുവരി 20ന് ഗുരുവായൂര്‍ ക്ഷേത്രത്തിൽവച്ചായിരുന്നു താര കല്യാണിന്റെ മകള്‍ സൗഭാഗ്യയുടെ വിവാഹം.

ഫെയ്സ്ബുക്ക് ലൈവിൽ എത്തിയാണ് മോശം പ്രചരണങ്ങൾക്കെതിരെ താര കല്യാൺ വൈകാരികമായി പ്രതികരിച്ച്. തന്റെ ഫോട്ടോ മോശമായ രീതിതിയിൽ പ്രചരിപ്പിച്ച് ആഘോഷിക്കുന്നവരോട് ഒരിക്കലും പൊറുക്കില്ല എന്ന് താര കല്യാൺ പറയുന്നു. 'സമൂഹമാധ്യമങ്ങളിൽ എന്നെ കുറിച്ചുള്ള ഒരു ഫോട്ടോ വലിയ രീതിയില്‍ വൈറലാകുന്നുണ്ട്. ചിലര്‍ അത് പങ്കുവെച്ച് ആസ്വദിക്കുകയാണ്. എന്റെ മകളുടെ കല്യാണം ഒറ്റയ്ക്ക് നടത്താനുള്ള ധൈര്യമില്ലാഞ്ഞിട്ടാണ് ഭഗവാനെ കൂട്ടുപിടിച്ച്, ഗുരുവായൂരപ്പന്റെ കൈപിടിച്ച് നടത്തിയ വിവാഹമാണത്.

ആ വിവാഹത്തിനിടയില്‍ എപ്പോഴോ ഉണ്ടായ ഒരു സംഭവത്തിന്റെ വിഡിയോ ക്ലിപ്പിന്റെ ഒരു ഭാഗമൊടുത്ത് അത് ഫോട്ടോ ആക്കി അതിനെ വൈറലാക്കിയിരിക്കുന്നു. അത് പോസ്റ്റ് ചെയ്ത മഹാനോട് ഞാന്‍ ചോദിക്കട്ടേ, നിന്റെയൊക്കെ മനസ്സ് കല്ലാണോ. നിനക്കുമില്ലേ വീട്ടിൽ അമ്മയൊക്കേ. ഈ ജന്മം ഞാനെന്ന വ്യക്തി നിന്നോട് പൊറുക്കില്ല. ഒരിക്കലും. പറ്റുമെങ്കില്‍ നിന്നെ സൃഷ്ടിച്ച ഈശ്വരന്‍ നിന്നോട് പൊറുക്കട്ടെ. നിന്നെ പ്രസവിച്ച നിന്‍റെ അമ്മയ്ക്ക് എന്റെ ഗതികേട് വരാതിരിക്കട്ടേ.

സമൂഹമാധ്യമങ്ങൾ നല്ലതാണ്. ഒരുപാട് നല്ല കാര്യങ്ങള്‍ അതുകൊണ്ട് ചെയ്യാം. പക്ഷേ, ഇങ്ങനെ നിങ്ങൾ ആരോടും ചെയ്യരുത്. അത് പലരുടേയും ഹൃദയം തകർക്കുന്നതാണ്. എന്നെ വേദനിപ്പിച്ച് നിങ്ങള്‍ സന്തോഷം കണ്ടെത്തുന്നുണ്ടെങ്കില്‍ അത് തെറ്റാണ്. നിങ്ങള്‍ക്ക് സന്തോഷം കണ്ടെത്താന്‍ ഒരുപാട് കാര്യങ്ങള്‍ ഉണ്ടാകും. ഒരുകാര്യം കൂടി എനിക്ക് പറയാനുണ്ട്. ഇത് പോസ്റ്റ് ചെയ്ത ആളോട്, ഇതിന് കമന്റ് ചെയ്യുകയും പ്രചരിപ്പിക്കുകയും ആഘോഷമാക്കുകയും ചെയ്തവരോട് പറയട്ടെ ഇതുവരെ പറഞ്ഞിട്ടില്ലാത്ത ഒരു കാര്യം. ഐ ഹെയ്റ്റ് യു. സ്ത്രീയാണെന്ന പരിഗണന കൊടുക്കാന്‍ പഠിക്കൂ'. താര കല്യാൺ ഫെയിസ്ബുക്ക് ലൈവിൽ പറഞ്ഞു.