കാര്‍ത്തിക് സുബ്ബരാജ് സംവിധാനം ചെയ്‌‌ത ധനുഷ് ചിത്രം ജഗമേ തന്തിരം പ്രേക്ഷകരെ നിരാശപ്പെടുത്തി. ഇരുവരും ഒന്നിച്ചപ്പോള്‍ ഒരു ക്ലാസിക് ചിത്രം പ്രതീക്ഷിച്ചവര്‍ക്ക് അതല്ല ലഭിച്ചത്. എങ്ങും സമ്മിശ്രപ്രതികരണം വന്നതോടെ ധനുഷ് അലര്‍ട്ടായിരിക്കുകയാണ്. തന്‍റെ അടുത്ത സിനിമ പ്രേക്ഷകര്‍ക്ക് ഒരു വിസ്‌മയാനുഭവം സമ്മാനിക്കുന്നതായിരിക്കണമെന്ന നിര്‍ബന്ധത്തിലാണ് ധനുഷ്.

അതിനായി, ധനുഷ് സഹോദരൻ സെൽവരാഘവനുമായി ചേർന്ന് ‘നാനേ വരുവേൻ’ എന്ന പുതിയ ചിത്രത്തിനായി ഒരുങ്ങുന്നതായാണ് പുതിയ റിപ്പോര്‍ട്ട്. കലൈപുലി എസ് താണുവിന്റെ വി ക്രിയേഷൻസ് ആണ് ചിത്രം നിർമ്മിക്കുന്നത്. ഛായാഗ്രാഹകൻ അരവിന്ദ് കൃഷ്ണ, സംഗീത സംവിധായകൻ യുവൻ ഷങ്കർ രാജ എന്നിവർ ഇതിനകം ഈ ടീമിനൊപ്പം ചേര്‍ന്നിട്ടുണ്ട്. ഓഗസ്റ്റ് 20 ന് ഇതിന്റെ ചിത്രീകരണം ആരംഭിക്കും.

ധനുഷും സെൽ‌വരാഘവനും ഇതിന്‌ മുമ്പ്‌ അവിസ്മരണീയമായ ചില ഹിറ്റുകൾ സമ്മാനിച്ചിട്ടുണ്ട്. 10 വർഷങ്ങൾക്ക് മുമ്പ് പുറത്തിറങ്ങിയ 'മയക്കം എന്ന' ആണ് അവരുടെ അവസാന ചിത്രം. ധനുഷ്, സെൽവരാഘവൻ, അരവിന്ദ് കൃഷ്ണ, യുവൻ ഷങ്കർ രാജ എന്നിവര്‍ തുള്ളുവതോ ഇളമൈ, കാതൽ കോണ്ടേൻ, പുതുപ്പേട്ടൈ എന്നീ സിനിമകളില്‍ ഒരുമിച്ചു പ്രവര്‍ത്തിച്ചു.

നാനേ വരുവേന് ശേഷം ആയിരത്തില്‍ ഒരുവന്‍ 2 എന്ന ചിത്രത്തിനായും ധനുഷും സെല്‍‌വരാഘവനും ഒന്നിക്കുന്നുണ്ട്.