തെലുങ്ക് താരം നാഗചൈതന്യയും ബോളിവുഡ് താരം ശോഭിതാ ധുലിപാലയും തമ്മിൽ പ്രണയത്തിലാണെന്ന വാർത്തകൾ കഴിഞ്ഞ ദിവസമാണ് മാധ്യമങ്ങൾ റിപ്പോർട്ട് ചെയ്തത്. വാർത്തകൾ പുറത്ത് വന്നതും ഇത്തരം വാർത്തകൾ പ്രചരിപ്പിക്കുന്നത് നാ​ഗചൈതന്യയുടെ പ്രതിച്ഛായ തകർക്കാനുള്ള മുൻഭാര്യയും നടിയുമായ സാമന്തയുടെ പി.ആർ ടീമാണെന്ന് നാഗചൈതന്യയുടെ ആരാധകർ കുറ്റപ്പെടുത്തിയിരുന്നു.

ഇപ്പോഴിതാ ഈ ആരോപണങ്ങൾക്ക് വായടപ്പിക്കുന്ന മറുപടി നൽകിയിരിക്കുകയാണ് സാമന്ത. ട്വിറ്ററിലൂടെയാണ് താരം ഈ ആരോപണങ്ങൾക്ക് മറുപടി നൽകിയത്. പെൺകുട്ടികളെ പറ്റി ഗോസിപ്പ് വന്നാൽ അത് സത്യം, ആൺകുടികൾക്കെതിരെയാണെങ്കിൽ പെൺകുടി ഉണ്ടാക്കിയത്. നിങ്ങൾക്ക് ഇനിയും പക്വത വന്നില്ലെ, ആദ്യം നിങ്ങൾ നിങ്ങളുടെ ജോലിയും കുടുംബവും നോക്കു എന്നാണ് താരത്തിൻ്റെ മറുപടി.

2017ൽ വിവാഹിതരായ സാമന്ത-നാഗചൈതന്യ ദമ്പതികൾ 2021 ഒക്ടോബറിലാണ് വേർ പിരിഞ്ഞത്. വിവാഹമോചനത്തിന് ശേഷം സിനിമയിൽ സജീവമായ താരം പുതിയ സിനിമകളുടെ തിരക്കിലാണ്. വിജയ് ദേവരകൊണ്ടയ്ക്കൊപ്പമുള്ള ഖുഷി, ശാകുന്തളം എന്നിവയാണ് സാമന്തയുടേതായി അണിയറയിലുള്ളത്. താങ്ക്യു ആണ് നാഗചൈതന്യയുടേതായി പുറത്തിറങ്ങാനുള്ള ചിത്രം.