സിനിമാ ചിത്രീകരണത്തിനായി ബഹിരാകാശത്തേക്ക് പറന്ന് റഷ്യൻ സംഘം. നടി യൂലിയ പെരേസില്‍ഡും സംവിധായകന്‍ കിം ഷിപെന്‍കോയുമാണ് സംഘത്തിലുള്ളത്. ചലഞ്ച് എന്ന് പേരിട്ടിരിക്കുന്ന റഷ്യൻ ചിത്രമാണ് ബഹിരാകാശത്ത് വെച്ച് ചിത്രീകരിക്കുന്നത്.

ഹൃദയസംബന്ധമായ രോഗം ബാധിച്ച ബഹിരാകാശ സഞ്ചാരിയുടെ ജീവന്‍ രക്ഷിക്കാനായി പുറപ്പെടുന്ന ഒരു ഡോക്ടറുടെ കഥയാണ് ചിത്രത്തിന്റെ പ്രമേയം.റഷ്യന്‍ സോയുസ് സ്‌പെയ്‌സ് ക്രാഫ്റ്റിലാണ് ഇവരുടെ യാത്ര. ബഹിരാകാശ യാത്രികനായ ആന്റണ്‍ ഷ്‌കപ്ലറേവും ഇവര്‍ക്കൊപ്പമുണ്ട്. സംഘം ബഹിരാകാശത്ത് സുരക്ഷിതമായി എത്തിചേർന്നതായാണ് റിപ്പോർട്ടുകൾ.

ബഹിരാകാശ യാത്രയുടെ ഭാഗമായി നടിയും സംവിധായകനും കുറച്ച് മാസങ്ങളായി കടുത്ത പരിശീലനത്തിലായിരുന്നു. പന്ത്രണ്ട് ദിവസത്തെ ചിത്രീകരണത്തിന് ശേഷം സംഘം ഭൂമിയിലേക്ക് മടങ്ങും.