അടുത്തിടെയായി പ്രകടനങ്ങള്‍ കൊണ്ട് മലയാളികളെ വിസ്മയിപ്പിക്കുന്ന തിരിക്കിലാണ് മലയാളികളുടെ മെഗാസ്റ്റാറായ മമ്മൂട്ടി. തുടര്‍ച്ചയായി മികച്ച സിനിമകള്‍ സമ്മാനിച്ചുകൊണ്ട് മമ്മൂട്ടി കമ്പനിയെന്ന നിര്‍മാണകമ്പനിയും മലയാള സിനിമയില്‍ ശക്തമായ സാന്നിധ്യമാണ് അറിയിക്കുന്നത്. അവസാനമായി മമ്മൂട്ടി കമ്പനിയുടെ ബാനറില്‍ തിയേറ്ററുകളിലെത്തിയ കാതല്‍ എന്ന സിനിമയും മികച്ച പ്രേക്ഷകപ്രതികരണമാണ് നേടിയത്.

പ്രമേയം കൊണ്ടും പ്രകടനങ്ങള്‍ കൊണ്ടും ഏറെ ചര്‍ച്ചയായ മമ്മൂട്ടി ചിത്രമായ കാതല്‍ ഇപ്പോള്‍ ഒടിടി റിലീസിന് തയ്യാറെടുക്കുന്നതായാണ് റിപ്പോര്‍ട്ട്. ഡിസംബര്‍ മാസത്തില്‍ ക്രിസ്മസ് സമയത്തോട് അനുബന്ധിച്ച് ഡിസംബര്‍ 23, 24 തീയ്യതികളില്‍ ഒന്നിലാകും സിനിമ ഒടിടിയില്‍ റിലീസ് ചെയ്യുക എന്നതാണ് ലഭിക്കുന്ന വിവരം. പൊതുവെ സിനിമകള്‍ തിയേറ്റര്‍ റിലീസ് ചെയ്ത് ഒരു മാസത്തിനകം ഒടിടിയിലെത്താറുണ്ട്.

പ്രമുഖ ഒടിടി പ്ലാറ്റ്‌ഫോമായ ജിയോ സിനിമയാണ് കാതലിന്റെ സ്ട്രീമിംഗ് ഏറ്റെടുത്തിരിക്കുന്നത് എന്നാണ് വിവരം. എന്നാല്‍ ആമസോണ്‍ പ്രൈം, ഡിസ്‌നി ഹോട്ട്സ്റ്റാര്‍ എന്നീ ഒടിടികളുടെ പേരും പറഞ്ഞുകേള്‍ക്കുന്നുണ്ട്. ഇത് സംബന്ധിച്ച ഔദ്യോഗിക പ്രഖ്യാപനം ഇതുവരെയും വന്നിട്ടില്ല. എന്നാല്‍ വരും ദിവസങ്ങളില്‍ തന്നെ ഇത് സംബന്ധിച്ച ഔദ്യോഗിക പ്രഖ്യാപനങ്ങള്‍ ഉണ്ടാകും.