ഇന്ന് മലയാളികളുടെ ജീവിതം സംഘര്‍ഷഭരിതമാണ്. പ്രവാസി മലയാളികളുടെ കാര്യം പ്രത്യേകിച്ചും. ഈ പ്രതിസന്ധിയില്‍ സാധാരണ പ്രവാസിയെ സംബന്ധിച്ചിടത്തോളം ഒരു കൗണ്‍സിലറെ കാണുക എന്നത് ക്ലേശകരമാണ്. സമയക്കുറവും സാമ്പത്തിക പരാധീനതകളും തന്നെ കാരണം. ഈ ഒരു പരിതസ്ഥിതിയിലാണ് ഒ എച്ച് റഹ്മാന്‍ ആശ്വാസമായെത്തുന്നത്.

രണ്ടര വര്‍ഷത്തോളമായി അദ്ദേഹം യുട്യൂബില്‍ അപ്‌ലോഡ്‌ ചെയ്യുന്ന വീഡിയോകള്‍ കണ്ട് പലരും നീറുന്ന പ്രശ്നങ്ങള്‍ക്ക് പരിഹാരം കണ്ടെത്തുന്നു. ആത്മഹത്യ ചെയ്യാന്‍ വരെ തീരുമാനിച്ച വ്യക്തികള്‍, ഇരുപതു മണിക്കൂറോളം നീണ്ടു നില്‍ക്കുന്ന അദ്ദേഹത്തിന്റെ വിവിധ വിഷയങ്ങളിലുള്ള വീഡിയോകള്‍ കണ്ട് തീരുമാനത്തില്‍ മാറ്റം വരുത്തുകയും ജീവിതത്തില്‍ പ്രതീക്ഷയുടെ പ്രകാശകിരണങ്ങള്‍ക്ക് രൂപം വന്ന ശേഷം സന്തോഷത്തോടെ റഹ്മാനെ വിളിക്കുകയും ചെയ്യുന്നു.

നിരാശയിലാണ്ടവര്‍ക്ക് ജീവിത വിജയത്തിന് വേണ്ട പ്രേരണകള്‍ എങ്ങനെ ഉണ്ടാക്കിയെടുക്കാമെന്ന് ഈ വീഡിയോകളിലൂടെ ആളുകള്‍ മനസ്സിലാക്കുന്നു. ദേഷ്യം എങ്ങിനെ നിയന്ത്രിക്കാം, പോസിറ്റീവ് ചിന്തയുടെ ശക്തി തുടങ്ങിയ സാധാരണ ജീവിതത്തില്‍ നാം അറിഞ്ഞിരിക്കേണ്ട വിഷയങ്ങളാണ് ഇരുപതു മണിക്കൂറോളം നീണ്ടു നില്ക്കുന്ന ഈ വീഡിയോകളില്‍ നിന്നും സൗജന്യമായി ലഭിക്കുന്നത്.