പൊലീസിന് വീഴ്ച പറ്റി, എനിക്ക് ഉത്തരവാദിത്തമില്ല: ഡല്ഹി കമ്മീഷണര്‍
ന്യൂഡല്‍ഹി|
WEBDUNIA|
PTI
അഞ്ചുവയസുകാരിയെ പീഡിപ്പിച്ച കേസ് കൈകാര്യം ചെയ്തതില്‍ ഡല്ഹി ഗാന്ധിനഗര്‍ പൊലീസിന് വീഴ്ച പറ്റിയതായി ഡല്ഹി പൊലീസ് കമ്മീഷണര്‍ നീരജ് കുമാര്‍ അറിയിച്ചു. എന്നാല്‍ ഇങ്ങനെ വീഴ്ച പറ്റിയതില്‍ തനിക്ക് ഉത്തരവാദിത്തമില്ലെന്നും അദ്ദേഹം വ്യക്തമാക്കി.
കേസ് രജിസ്റ്റര്‍ ചെയ്യുന്നതില്‍ കാലതാമസം ഉണ്ടായിട്ടില്ല. എന്നാല്‍ സംഭവം ഒതുക്കിത്തീര്‍ക്കാന്‍ ശ്രമിച്ച പൊലീസുകാര്‍ക്കെതിരെ മാതൃകാപരമായ നടപടിയുണ്ടാകും.
പ്രതിഷേധിച്ച പെണ്‍കുട്ടിയുടെ കരണത്തടിച്ച എ സി പിക്കെതിരെ വകുപ്പുതല അന്വേഷണം നടത്തുമെന്നും കമ്മീഷണര്‍ അറിയിച്ചു. എ സി പിക്കെതിരെ ലെഫ്.ഗവര്‍ണര്‍ അന്വേഷണത്തിന് ഉത്തരവ് നല്‍കിയിട്ടുണ്ടെന്നും നീരജ് കുമാര്‍ അറിയിച്ചു.
അതേസമയം, അഞ്ചുവയസുകാരിയെ പീഡിപ്പിച്ച കേസില്‍ രണ്ടാം പ്രതിയും പൊലീസ് പിടിയിലായി. പത്തൊമ്പത് വയസുള്ള പ്രദീപ് കുമാര്‍ എന്നയാളാണ് അറസ്റ്റിലായത്. നേരത്തേ അറസ്റ്റിലായ മനോജ് കുമാര്‍ നല്‍കിയ വിവരത്തിന്‍റെ അടിസ്ഥാനത്തിലാണ് പ്രദീപിനെ പിടികൂടിയിട്ടുള്ളത്.
