മരുന്നു കടയില്‍ നിന്ന് തെറ്റായ മരുന്നു കഴിച്ചതിനു ശേഷം രണ്ടു വയസ്സുകാരിയ്ക്ക് ദാരുണാന്ത്യം. ഡല്‍ഹിയിലെ ഷഹ്ദാര ജിടിബി എന്‍ക്ലേവിന് അടുത്തുള്ള മരുന്നു കടയില്‍ നിന്നു വാങ്ങിയ മരുന്നു കഴിച്ചാണ് കുഞ്ഞ് മരിച്ചതെന്ന് പോലീസ് പറഞ്ഞു.

അവശനിലയിലായ കുഞ്ഞിനെ ആശുപത്രിയില്‍ എത്തിച്ചെങ്കിലും വ്യാഴാഴ്ചയോടെ മരിക്കുകയായിരുന്നു. കുഞ്ഞിന് പനിയും ചുമയും ഉണ്ടായതിനെ തുടര്‍ന്ന് ബുധനാഴ്ചയാണ് കടയില്‍ നിന്ന് അമ്മ മരുന്നു വാങ്ങിയതെന്ന് പോലീസ് പറയുന്നു.

കുഞ്ഞിന് അസുഖം കുറയാതിരുന്നതിനെ തുടർന്ന്, വീണ്ടും മരുന്നു കടയില്‍ പോകുകയും കടയുടമ ഒരു ഇഞ്ചക്ഷന്‍ നല്‍കുകയും ചെയ്തു. തുടര്‍ന്ന്, വീട്ടിലെത്തിയ കുഞ്ഞ് രക്തം ഛര്‍ദ്ദിക്കാന്‍ തുടങ്ങി. അടുത്തുള്ള ജിടിബി ആശുപത്രിയില്‍ എത്തിച്ചെങ്കിലും കുഞ്ഞിന് മരണം സംഭവിക്കുകയായിരുന്നു. സംഭവത്തില്‍ പോലീസ് കേസ് രജിസ്റ്റര്‍ ചെയ്തു അന്വേഷണം തുടങ്ങി.