മത്സരത്തിനില്ലെന്ന് പറഞ്ഞ സുരേഷ് ഗോപി നിര്‍ബന്ധമാണെങ്കില്‍ ഗുരവായൂരില്‍ മത്സരിക്കാമെന്നാണ് കേന്ദ്രത്തോട് പറഞ്ഞത്. വിജയ സാധ്യതയുള്ള എ പ്ലസ് മണ്ഡലങ്ങളായ വട്ടിയൂര്‍ക്കാവ്, തിരുവനന്തപുരം, തൃശൂര്‍ എന്നിവയാണ് ബിജെപി സുരേഷ് ഗോപിക്കായി മാറ്റിവച്ചിരുന്നത്. വ്യാഴാഴ്ച ബിജെപി സ്ഥാനാര്‍ത്ഥി പട്ടികയ്ക്ക് അന്തിമ രൂപമാകും. നിയമസഭാ തിരഞ്ഞെടുപ്പില്‍ ഗുരുവായൂരില്‍ ബിജെപിക്ക് ഇതുവരെ മുപ്പതിനായിരം വോട്ടുകള്‍ പോലും സ്വന്തമാക്കാന്‍ സാധിച്ചിട്ടില്ല. സുരേഷ് ഗോപിയുടെ തീരുമാനം കേന്ദ്ര- സംസ്ഥാന നേതൃത്വത്തെ ഒരുപോലെ ഞെട്ടിച്ചിരിക്കുകയാണ്.

സിനിമാ തിരക്കുകള്‍ ഉള്ളതിനാല്‍ മത്സരരംഗത്തില്ലെന്ന് പറഞ്ഞെങ്കിലും ഉറപ്പായും മത്സരിക്കണമെന്നാണ് ബിജെപി സുരേഷ് ഗോപിയോട് ആവശ്യപ്പെടുന്നത്. ശോഭാ സുരേന്ദ്രനും സ്ഥാനാര്‍ത്ഥിയാകാന്‍ സാധ്യതയുണ്ട്. കഴക്കൂട്ടം, മഞ്ചേശ്വരം, കോന്നി ഇതിലേതിലെങ്കിലും ഒന്നിലായിരിക്കും കെ സുരേന്ദ്രന്‍ മത്സരിക്കുന്നത്.