എസ്എസ് രാജമൗലി സംവിധാനം ചെയ്ത ഇന്ത്യന്‍ സിനിമയിലെ ഏറ്റവും മുതല്‍ മുടക്കുള്ള ചിത്രമായ ബാഹുബലിയുടെ
തീയേറ്റർ പ്രിന്റ് ഇന്റർനെറ്റിൽ പ്രചരിക്കുന്നു. ഹിന്ദി പതിപ്പിന്റെ പ്രിന്റാണ് വിവിധ വെബ്‌സൈറ്റുകളിൽ പ്രചരിക്കുന്നത്. മൂവ്എംബെഡ്, മൂവിറൂൾസ്, വീഡിയോഹട്ട് തുടങ്ങിയ സൈറ്റുകളിലാണ് ചിത്രം നിലവിൽ ലഭ്യമാകുന്നത്.

വെള്ളിയാഴ്‌ച റിലീസ് ചെയ്‌ത ചിത്രത്തിന് മികച്ച കളക്ഷനാണ് ലഭിച്ചത്. അതിനിടെയാണ് ചിത്രത്തിന്റെ ഹിന്ദി പതിപ്പിന്റെ പ്രിന്റ് പ്രചരിക്കുന്നത്. അടുത്തിടെ റിലീസ് ചെയ്ത ബോളിവുഡ്, തെലുങ്ക് ചിത്രങ്ങളും ഈ സൈറ്റുകളിൽ ലഭ്യമാണ്. കമൽഹാസൻ നായകനായ ദൃശ്യം തമിഴ്പതിപ്പ് പാപനാസത്തിന്റേയും തീയേറ്റർ പ്രിന്റ് ചില സൈറ്റുകളിൽ ലഭ്യമായിരുന്നു.

പ്രഭാസ് നായകനാകുന്ന ചിത്രം മലയാളമുൾപ്പടെ നാലുഭാഷകളിലും വിദേശഭാഷകളിലും മൊഴിമാറ്റം ചെയ്യുന്നുണ്ട്. അനുഷ്‌കാ ഷെട്ടിയും തമന്നയുമാണ് നായികകഥാപാത്രങ്ങളെ അവതരിപ്പിക്കുന്നത്. രമ്യ കൃഷ്ണൻ, സത്യരാജ്, നാസർ എന്നിവരും പ്രധാനവേഷങ്ങളിലെത്തുന്നു.