ക്രിസ്തുമസിന് ഇന്ത്യൻ ജനതയ്ക്ക് പാകിസ്ഥാന്റെ വക സമ്മാനം. പാകിസ്ഥാൻ ജയിലിൽ കഴിയുന്ന 439 ഇന്ത്യൻ തടവുകാരെ വിട്ടയക്കാൻ തീരുമാനമായി. രണ്ട് ഘട്ടങ്ങളായാണ് തടവുകാരെ നാട്ടിലേക്ക് വിട്ടയക്കുക. ആദ്യ ഘട്ടത്തിൽ വിട്ടയക്കുന്ന ആളുകൾ ക്രിസ്തുമസ് ദിനത്തിൽ നാട്ടിലെത്തും. ഇരു രാജ്യങ്ങളിലേയും നയതന്ത്ര പ്രതിനിധികൾ നടത്തിയ ചർച്ചയെ തുടർന്നാണ് ഇക്കാര്യത്തിൽ തീരുമാനമായത്.

മത്സ്യബന്ധനത്തിനിടെ മനഃപൂർവ്വമല്ലാതെ സമുദ്രാർത്തി ലംഘിച്ചതിനാണ് 439 പേരേയും പാകിസ്ഥാൻ അറസ്റ്റ് ചെയ്ത് തടവിലാക്കിയത്. 220 തൊഴിലാളികളെ ആദ്യഘട്ടത്തിൽ വിട്ടയക്കും. ബാക്കിയുള്ള 219 പേരെ ജനുവരി 5നും വിട്ടയക്കുന്നതായിരിക്കും. ഒപ്പം പാകിസ്ഥാൻ പിടിച്ച് വെച്ച മത്സ്യബന്ധന ബോട്ടുകളും വിട്ടു നൽകുന്നതിലും തീരുമാനമായി.

പാകിസ്ഥാൻ - ഇന്ത്യ ഫോറം ഫോർ പീസ് ആൻഡ് ഡെമോക്രസിയുടെ വാക്താവ് ജതിൻ ദേശായി ആണ് ഇക്കാര്യം വ്യക്തമാക്കിയത്. തടവുകാരെ നാട്ടിലെത്തിക്കുന്നത് വളരെ പ്രാധാന്യമുള്ളതും സുരക്ഷ നൽകേണ്ടതുമായ നടപടിയാണെന്നും അദ്ദേഹം വ്യക്തമാക്കി. പാകിസ്ഥാൻ സ്വീകരിച്ച നടപടിക്ക് തുല്യമായി ഇന്ത്യയും ഇതേ നിലപാട് സ്വീകരിക്കണമെന്ന് ഫോറം ആവശ്യപ്പെട്ടിട്ടുണ്ട്. ഇന്ത്യൻ ജയിലുകളിൽ ഉള്ള പാകിസ്ഥാൻ മീൻ പിടുത്തക്കാരെ വിട്ടയക്കണമെന്നാണ് ഫോറത്തിന്റെ ആവശ്യം. 80 പാകിസ്താൻ തൊഴിലാളികളാണ് ഗുജറാത്ത് ജയിലിൽ കഴിയുന്നത്.