രണ്ടു ദിവസത്തെ ഇന്ത്യാ സന്ദര്‍ശനം റദ്ദു ചെയ്‌ത് പോപ്പ് ഗായകന്‍ ജസ്‌റ്റിന്‍ ബിബര്‍ ആരുമറിയാതെ പാതിരാത്രി തന്നെ അമേരിക്കയിലേക്കു മടങ്ങിയത് എന്തിനാണെന്ന ചോദ്യം ആരാധകര്‍ക്കിടെയില്‍ നിന്ന് ഉയരുകയാണ്.

പരിപാടിക്കു സമ്മിശ്ര പ്രതികരണം നേരിടേണ്ടി വന്നതിന്റെ അപമാനത്തിലാകാം ബീബര്‍ ഇന്ത്യ വിട്ടതെന്നായിരുന്നു ആരാധകര്‍ അടകം പറഞ്ഞിരുന്നത്. എന്നാല്‍, അദ്ദേഹത്തിന് ഇന്ത്യന്‍ കാലാവസ്ഥ പിടിച്ചില്ലെന്നും ചൂട് സഹിക്കാന്‍ കഴിയാത്തതിനാലാണ് രാത്രി തന്നെ യു എസിലേക്ക് മടങ്ങിയതെന്നാണ് താരത്തോട് അടുത്ത വൃത്തങ്ങളെ ഉദ്ധരിച്ച് ഒരു ദേശീയ മാധ്യമം റിപ്പോര്‍ട്ട് ചെയ്യുന്നത്.

ചൂട് സഹിക്കാന്‍ കഴിയാത്ത ബീബര്‍, ഷര്‍ട്ട് ഊരി കൈയില്‍ പിടിച്ചായിരുന്നു വണ്ടിയില്‍ കയറിയതെന്ന് ഇന്ത്യന്‍ എക്‌സ്പ്രസ് പറയുന്നു. സംഗീത പരിപാടിയ്ക്കിടയിലും ചൂട് സഹിക്കാന്‍ അദ്ദേഹത്തിന് കഴിഞ്ഞില്ല. വിയർപ്പു തുടയ്ക്കാനേ ബീബറിനു സമയമുണ്ടായിരുന്നുള്ളൂ. അതിനാല്‍ ഒരു നീല ടവ്വൽ കയ്യിൽ കരുതിയിരുന്നു. ഗിത്താര്‍ വായന പിഴച്ചത് ഇതുകൊണ്ടാണെന്നും താരത്തോട് അടുത്തവൃത്തങ്ങളെ ഉദ്ധരിച്ച് ദേശീയമാധ്യമങ്ങള്‍ റിപ്പോര്‍ട്ട് ചെയ്യുന്നു.

മുംബൈയിലെ സംഗീത പരിപാടി കഴിഞ്ഞ് പാതിരാത്രി തന്നെ താരം യുഎസിലേക്ക് മടങ്ങുകയായിരുന്നു. താജ് മഹല്‍ കാണാനോ, ബോളിവുഡ് താരങ്ങൾക്കൊപ്പം പാർട്ടിയില്‍ പങ്കെടുക്കാനോ നില്‍ക്കാതെയാണ് ബീബര്‍ മടങ്ങിയത്. സംഘാടകരായ വൈറ്റ് ഫോക്സ് കമ്പനി ബീബറിന്റെ വരവും പോക്കും ആസൂത്രണം ചെയ്തിരുന്നത്.