തമിഴ്നാട് മുഖ്യമന്ത്രി എം കരുണാനിധിയുടെ മകളും ഡി എം കെ എം പിയുമായ കനിമൊഴിയെ 2ജി സ്പെക്ട്രം കേസില്‍ പ്രതിചേര്‍ക്കുമെന്ന് റിപ്പോര്‍ട്ടുകള്‍. ഐ പി സി 120ബി വകുപ്പ് പ്രകാരം ക്രിമിനല്‍ ഗൂഡാലോചന കുറ്റം ചുമത്തിയാണ് കനിമൊഴിയെ സി ബി ഐ പ്രതിചേര്‍ക്കുക. ഏപ്രില്‍ രണ്ടിനാണ് സി ബി ഐ പ്രത്യേക കോടതിയില്‍ കുറ്റപത്രം സമര്‍പ്പിക്കുക.
സ്പെക്ട്രം അഴിമതിയുമായി ബന്ധപ്പെട്ട് കനിമൊഴിയെയും കരുണാനിധിയുടെ രണ്ടാം ഭാര്യ ദയാലു അമ്മാളിനെയും സി ബി ഐ ചോദ്യം ചെയ്തിരുന്നു. ചെന്നൈയില്‍ കലൈഞ്ജര്‍ ടി വി ഓഫീസില്‍ നടന്ന ചോദ്യംചെയ്യല്‍ മൂന്നുമണിക്കൂറോളം നീണ്ടുനിന്നിരുന്നു. സ്പെക്ട്രം ലൈസന്‍സ് വിതരണത്തില്‍ മുന്‍ ടെലികോംമന്ത്രി എ രാജ വഴിവിട്ട് സഹായിച്ചതായി ആരോപിക്കപ്പെടുന്ന സ്വാന്‍ ടെലികോമിന്റെ പ്രൊമോട്ടര്‍മാരിലൊരാളായ ഷാഹിദ് ഉസ്മാന്‍ ബല്‍വ വഴി കലൈഞ്ജര്‍ ടി വി യിലേക്ക് കോടികള്‍ ഒഴുകിയതായി തെളിഞ്ഞിരുന്നു. 214 കോടി രൂപയുടെ ഇടപാടായിരുന്നു നടന്നത്. ഇതെക്കുറിച്ചും സി ബി ഐ ഉദ്യോഗസ്ഥര്‍ കനിമൊഴിയോട് വിശദമായി ചോദിച്ചറിഞ്ഞിരുന്നു.
കലൈഞ്ജര്‍ ടി വി യില്‍ ദയാലു അമ്മാളിന് 60 ശതമാനം ഓഹരിയും കനിമൊഴിക്ക് 20 ശതമാനം ഓഹരിയുമാണുള്ളത്. കരുണാനിധിയുടെ മൂന്നാമത്തെ ഭാര്യ രാജാത്തിയിലുള്ള മകളാണ് കനിമൊഴി.
