എല് ഡി എഫ് വിട്ട് യു ഡി എഫിലേക്ക് പോയവര്‍ തിരികെവരുമെന്ന് സിപിഎം പി ബി അംഗം എസ് രാമചന്ദ്രന്‍ പിള്ള. അവര്‍ നിലപാട് മാറ്റുമ്പോള്‍ ഞങ്ങള്‍ സമീപനം മാറ്റും. രാഷ്ട്രീയത്തില്‍ തൊട്ടുകൂടായ്മ ഇല്ലെന്നും അദ്ദേഹം വ്യക്തമാക്കി. ഇ എം എസ് തന്നെ ഇക്കാര്യം വ്യക്തമാക്കിയിട്ടുള്ളതായി എസ് ആര് പി ചൂണ്ടിക്കാട്ടി.
യു ഡി എഫ് സര്‍ക്കാരിനെ ഏതുവിധേനയും താഴെയിറക്കണമെന്ന് എല് ഡി എഫ് നേതൃയോഗത്തില്‍ തീരുമാനമായതിന് പിന്നാലെയാണ് എസ് ആര് പി ഇക്കാര്യം വ്യക്തമാക്കിയത് എന്നത് ശ്രദ്ധേയമാണ്. മാത്രമല്ല എല് ഡി എഫ് വിട്ടുപോയ കക്ഷികളെ തിരിച്ചെടുക്കുന്ന കാര്യത്തില്‍ സി പി എം സംസ്ഥാന സെക്രട്ടറി പിണറായി വിജയനും അനുകൂല നിലപാട് സ്വീകരിച്ചിരുന്നു.
യു ഡി എഫിലെ ഘടക കക്ഷികള്‍ക്കിടയില്‍ അസംതൃപ്തി പുകയുന്നതിനിടെയാണ് എല് ഡി എഫ് നേതൃത്വം പുതിയ നീക്കത്തിന് ശ്രമം നടത്തുന്നത്. കേരളാ കോണ്‍ഗ്രസ് മാണി വിഭാഗമാണ് യു ഡി എഫില്‍ ഇപ്പോള്‍ ഏറ്റവും അസംതൃപ്തര്‍. ജോസ് കെ മാണിയെ കേന്ദ്ര മന്ത്രിയാക്കാത്തത് ഉള്‍പ്പടെയുള്ള വിഷയങ്ങളില്‍ മാണിക്ക് കടുത്ത അതൃപ്തിയുണ്ട്. ഇത് മുതലെടുക്കാനാണ് എല് ഡി എഫിന്റെ ശ്രമം.
