ദുബായ് പെണ്‍വാണിഭ റാക്കറ്റിന്റെ നിര്‍ദേശങ്ങൾക്ക് വഴങ്ങാത്ത പെണ്‍കുട്ടികളെ മരുഭൂമിയില്‍ കുഴിച്ചുമൂടാന്‍ ശ്രമിച്ചതായി റിപ്പോര്‍ട്ട്. പെൺവാണിഭ സംഘത്തിന്റെ പിടിയിൽ നിന്ന് രക്ഷപ്പെട്ട് പുറത്തുവന്ന പൂവത്തൂര്‍ സ്വദേശിയായ യുവതിയാണ് ഈ രഹസ്യമൊഴി പൊലീസിന് നൽകിയത്.

വീട്ടുജോലി വാഗ്ദാനം ചെയ്താണ് മനുഷ്യക്കടത്തു സംഘം തന്നെ വലയിലാക്കിയത്. തുടര്‍ന്ന് ഇവര്‍ എന്നെ പെൺവാണിഭ സംഘത്തിന് കൈമാറി. പെൺവാണിഭത്തിനാണെന്നു മനസ്സിലായതോടെ ഞാന്‍ വഴങ്ങിയില്ല. മൂന്നു ദിവസം ഭക്ഷണം തരാതെ മുറിയില്‍ അടച്ചിട്ടെങ്കിലും തയാറായില്ല.

അവർ മുറിയിലേക്കു കടത്തിവിട്ട ഇടപാടുകാരന്റെ കാലുപിടിച്ച് അപേക്ഷിച്ചപ്പോൾ അയാള്‍ ഉപദ്രവിക്കാതെ പുറത്തുപോയിയെന്നും യുവതി പറഞ്ഞു. പിന്നീട് മരണ ഭയത്താല്‍ അവരുടെ താൽപര്യങ്ങൾക്കു വഴങ്ങേണ്ടി വന്നതായും യുവതി വ്യക്തമാക്കി.

അതേസമയം ദുബായ് കേന്ദ്രീകരിച്ച് നടത്തിവന്നിരുന്ന പെണ്‍‌വാണിഭ സംഘത്തിലെ കണ്ണിയായ മലയാളി വീട്ടമ്മ അറസ്റ്റിലായിരുന്നു‍. പുനലൂര്‍ സ്വദേശിനി ശാന്തയാണ്‌ അറസ്റ്റിലായത്. പെ‌ണ്‍‌വാണിഭ സംഘങ്ങള്‍ക്ക് പെണ്‍കുട്ടികളെ എത്തിച്ചു നല്‍കുന്ന കേരളത്തിലെ ഏജന്റാണ് ശാന്ത.