ഡ്യൂട്ടികഴിഞ്ഞ് പോകുകയായിരുന്ന പൊലീസുകാരനെ ബൈക്കിലെത്തിയ സംഘം ആക്രമിച്ചു
തിരുവനന്തപുരം|
WEBDUNIA|
PRO
രാത്രിയില്‍ ഡ്യൂട്ടികഴിഞ്ഞ് ബൈക്കില്‍ വീട്ടിലേക്ക് പോകുകയായിരുന്ന പൊലീസുകാരനെ മറ്റൊരു ബൈക്കിലെത്തിയ സംഘം വഴിയില്‍ തടഞ്ഞ് ആക്രമിച്ചു. സ്വര്‍ണമാലയും പഴ്സും മറ്റും കവരാനുള്ള ശ്രമം വിഫലമായെങ്കിലും പൊലീസുകാരന്റെ മൊബൈല്‍ തട്ടിയെടുത്ത് അക്രമിസംഘം കടന്നു.
വലിയതുറ പൊലീസ് സ്റ്റേഷനിലെ സിവില്‍ പൊലീസ് ഓഫീസര്‍ ശിവകുമാറാണ് ആക്രമണത്തിനിരയായത്. ഇന്നലെ രാത്രി 10.30 ഓടെയായിരുന്നു സംഭവം. ശിവകുമാറിന്റെ ബൈക്കിന് കുറുകെ ബൈക്ക് നിറുത്തിയശേഷം അതില്‍ നിന്നിറങ്ങിയ മൂന്നംഗസംഘം സ്വര്‍ണമാല പൊട്ടിച്ചെടുക്കാനും പേഴ്സ് കവരാനും ശ്രമിച്ചു.
ശിവകുമാര്‍ ബഹളം കൂട്ടുകയും അതുവഴി വന്ന മറ്റ് യാത്രക്കാര്‍ പ്രശ്നത്തില്‍ ഇടപെടുകയും ചെയ്തതോടെ മൂവര്‍ സംഘം മൊബൈല്‍ ഫോൺ തട്ടിയെടുത്ത് ബൈക്കില്‍ കടന്നു.
ശംഖുമുഖം പൊലീസ് ശിവകുമാറിനെ ജനറല്‍ ആശുപത്രിയില്‍ പ്രവേശിപ്പിച്ചു. കണ്ടാലറിയാവുന്ന മൂന്നംഗസംഘത്തിനെതിരെ കൊലപാതക ശ്രമത്തിനും കവര്‍ച്ചയ്ക്കും കേസെടുത്ത് അന്വേഷണം ആരംഭിച്ചു.
