വരുന്ന നിയമസഭാ തെരഞ്ഞെടുപ്പില്‍ അഴീക്കോട് മണ്ഡലത്തില്‍ ഇടതുമുന്നണിയുടെ സ്വതന്ത്ര സ്ഥാനാര്‍ത്ഥിയാണ് മാധ്യമപ്രവര്‍ത്തകനും എം വി രാഘവന്‍റെ മകനുമായ എം വി നികേഷ് കുമാര്‍. ഇടതുമുന്നണി സ്ഥാനാര്‍ത്ഥിയായി പ്രഖ്യാപനം ഉണ്ടായതിന് പിന്നാലെ ഇതേക്കുറിച്ച് നികേഷ് തന്‍റെ ഫേസ്ബുക്ക് പേജില്‍ പോസ്റ്റിട്ടു. അഴീക്കോട് തന്‍റെ ജന്‍‌മനാടാണെന്നും നാട്ടിലേക്ക് മടങ്ങുകയാണെന്നുമാണ് നികേഷ് കുറിച്ചിരിക്കുന്നത്.

നികേഷിന്‍റെ ഫേസ്ബുക്ക് പോസ്റ്റിന്‍റെ പൂര്‍ണരൂപം:

വരുന്ന നിയമസഭാതെരഞ്ഞെടുപ്പിൽ കണ്ണൂർ ജില്ലയിലെ അഴീക്കോട് മണ്ഡലത്തിൽ നിന്ന് ഇടതു ജനാധിപത്യ മുന്നണി പിന്തുണയ്ക്കുന്ന സ്വതന്ത്ര സ്ഥാനാർത്ഥിയായി മത്സരിക്കാൻ ഒരുങ്ങുകയാണ്.

രാഷ്ട്രീയം എന്റെ രക്തത്തിലുള്ളതാണ്. കേരളത്തിലെ കമ്മ്യൂണിസ്റ്റ് പ്രസ്ഥാനത്തിന്റെ രണ്ടാം തലമുറ നേതാക്കളിൽ പ്രധാനിയായിരുന്നു അച്ഛൻ എം വി രാഘവൻ. അച്ഛൻ പാർട്ടിയുമായി പിണങ്ങിപ്പിരിഞ്ഞ കാലഘട്ടത്തിൽ മാധ്യമപ്രവർത്തനം എന്ന കർമ്മമണ്ഡലമാണ് ഞാൻ തെരഞ്ഞെടുത്തത്. ഏഷ്യാനെറ്റിലെ ചെറിയ കാലം കഴിഞ്ഞ് ഇന്ത്യാവിഷൻ, റിപ്പോർട്ടർ എന്നീ സ്ഥാപനങ്ങളുടെ എഡിറ്റോറിയൽ ചുമതലയിലിരുന്നുകൊണ്ടാണ് ഒന്നര പതിറ്റാണ്ടോളം ആ ജോലി ചെയ്തത്.

മാധ്യമപ്രവർത്തനം എനിക്ക് രാഷ്ട്രീയ പ്രവര്‍ത്തനത്തിന്റെ ഭാഗം തന്നെയായിരുന്നു. മലയാളത്തിൽ ടെലിവിഷൻ വാർത്താസംസ്‌കാരം രൂപപ്പെട്ടുവന്ന കാലമായിരുന്നു ഇത്. ഈ കാലത്തുടനീളം നമ്മുടെ നാടിനെ കൂടുതൽ നീതിയുക്തമായ ഒരു സമൂഹമാക്കാനും നമ്മുടെ രാഷ്ട്രീയ മേഖലയെ കൂടുതൽ സുതാര്യമാക്കാനും നടക്കുന്ന എണ്ണമറ്റ പരിശ്രമങ്ങളുടെ ഭാഗമാകാനാണ് ഞാനും എന്റെ സഹപ്രവർത്തകരും ശ്രമിച്ചത്.

ഇത് ഒരു വഴിത്തിരിവാണ്. മാധ്യമപ്രവർത്തകൻ എന്ന നിലയിൽ നിന്ന് ഒരു രാഷ്ട്രീയ പ്രവർത്തകൻ എന്ന നിലയിലേക്ക് മാറാനുള്ള അവസരം. എന്നാൽ രാഷ്ട്രീയമായി ഇതുവരെ പുലർത്തിപ്പോന്ന നിലപാടുകളുടെ തുടർച്ച തന്നെയാണ് മനസിലുള്ളത്.

നമ്മുടെ രാഷ്ട്രീയം ചരിത്രപരമായ ഒരു സന്ധിയിൽ നിൽക്കുന്പോഴാണ് ഈ തെരഞ്ഞെടുപ്പ്. സാമൂഹിക ജീവിതത്തിൽ വേർതിരിവുകളും അസഹിഷ്ണുതയും വളർത്താൻ ബോധപൂർവമായ ശ്രമങ്ങൾ നടക്കുന്നു. ബഹുസ്വരവും മതനിരപേക്ഷവുമായ നമ്മുടെ രാഷ്ട്ര മനസിനെ സങ്കുചിതവും മതാത്മകവുമാക്കാൻ ആസൂത്രിതമായ നീക്കങ്ങൾ നടക്കുന്നു. ഇതിന് ഫലപ്രദമായി തടയിടാൻ കഴിയുക ഇടതുപക്ഷ മനസുള്ള ഒരു രാഷ്ട്രീയത്തിനാണ് എന്ന് ഞാൻ വിശ്വസിക്കുന്നു. എന്റെ സ്ഥാനാർത്ഥിത്വത്തിനുള്ള ഇടതുമുന്നണി പിന്തുണയുടെ വിശദീകരണം ഇതുമാത്രമാണ്.

അഴീക്കോട് എന്റെ ജന്മനാനാടാണ്. നാടുമായി എനിക്ക് വൈകാരിക ബന്ധമുണ്ട്. ഞാൻ എന്റെ നാട്ടിലേക്ക് മടങ്ങുകയാണ്. ഈ സന്തോഷം സുഹൃത്തുക്കളുമായി പങ്കുവെക്കാനാണ് ഈ കുറിപ്പ്.