മദ്യപിച്ച ടിടി‌ആര്‍ വീട്ടമ്മയെ ട്രെയിനില്‍ നിന്നും തള്ളിയിട്ട് കൊന്നു. മഹാരാഷ്ട്രയിലെ ജല്‍‌ഗാനിലാണ് സംഭവം നടന്നത്.
38കാരിയായ ഉജ്വല പാണ്ഡെയാണ് സമ്പത്ത് സലുങ്കെ എന്ന ടിടി‌ആറിന്റെ ആക്രമണത്തില്‍ കൊല്ലപ്പെട്ടത്.

മുംബൈയില്‍ നിന്നും ബീഹാറിലേക്ക് പോയ ലോകമാന്യ തിലക് എക്സ്പ്രസിലാണ് സംഭവം നടന്നത്. ഉജ്വലയും മകളും, സഹോദര പുത്രനും ബോഗി മാറി എസി‌ കമ്പാര്‍ട്ട്മെന്റില്‍ കയറി. ഇതേ സമയം മദ്യപിച്ച് സമീപത്തെത്തിയ സമ്പത്ത് ഉജ്വലയോട് കമ്പാര്‍ട്ട്മെന്റില്‍ നിന്നും ഇറങ്ങി പോകാന്‍ ആവശ്യപ്പെട്ടു.

തുടര്‍ന്ന് സമ്പത്ത് ഉജ്വലയെ ട്രെയിനില്‍ നിന്നും പുറത്തേക്ക് തള്ളുകയായിരുന്നു. ട്രെയിനില്‍ നിന്നും പുറത്ത് വീണ ഉജ്വല ചക്രങ്ങള്‍ക്കിടയില്‍പ്പെട്ട് കൊല്ലപ്പെട്ടു. ഇതൊന്നും ഗൌനിക്കാതെ സമ്പത്ത്
പാന്റി റൂമില്‍ പോയി വിശ്രമിക്കാന്‍ തുടങ്ങി.

കുപിതരായ യാത്രികര്‍ തുടര്‍ന്ന് ട്രെയിന്‍ നിര്‍ത്തുകയും സമ്പത്തിന് പുറത്തേക്ക് വലിച്ചിഴച്ച് കൊണ്ട് പോയി മര്‍ദ്ദിക്കുകയുമായിരുന്നു. തുടര്‍ന്ന് സമ്പത്തിനെ പൊലീസ് സ്റ്റേഷനില്‍ എത്തിച്ചു. ഇവിടെ വച്ചും യാത്രികര്‍ സമ്പത്തിനെ ക്രൂരമായി മര്‍ദ്ദിച്ചു. ഇയാള്‍ പൊലീസ് കസ്റ്റഡിയിലാണ്.